ខេត្តប៉ៃលិន ៖ នៅថ្ងៃទី១៨ ខែធ្នូ ឆ្នាំ២០២២នេះ លោកជំទាវ បាន ស្រីមុំ អភិបាលខេត្តប៉ៃលិន បានដឹកនាំក្រុមងារ មន្រ្តីសាលាខេត្ត និងយុវជន ស.ស.យ.ក ខេត្ត ចុះទៅរៀបចំតុបតែង ផ្លូវឡើងទៅកាន់រមណីយដ្ឋានទឹកធ្លាក់អូរតាវ៉ៅ ហៅភ្នំខៀវ ខណ:ថ្ងៃចូលឆ្នាំសកលជិតមកដល់ ដើម្បីទាក់ទាញភ្ញៀវទេសចរណ៍ជាតិ និងអន្តរជាតិ ឱ្យចូលមកលេងកម្សាន្តកាន់តែច្រើនកុះករ។
រដ្ឋបាលខេត្តប៉ៃលិននិងក្រុមការងារ ចូលទៅរៀបចំបោសសម្អាត កាប់ឆ្កាព្រៃនៅសងខាងផ្លូវឡើងទៅលេងរមណីយដ្ឋានទឹកធ្លាក់ភ្នំខៀវ ដោយបែងចែកជាក្រុមៗផងដែរ។
ក្រុមខ្លះដើររើសសំរាមនៅសងខាងផ្លូវ ក្រុមខ្លះជម្រះស្មៅ កាត់មែកឈើនៅក្បែរចិញ្ចើមផ្លូវ និងក្រុមខ្លះទៀតជីកកកា យដីជើងភ្នំ ដាក់នៅកន្លែងមានជង្ហក់ ដែលទឹកភ្លៀងហូរដាច់។
ម្យ៉ាងវិញទៀត រដ្ឋបាលខេត្តប៉ៃលិន ក៏បានរៀបចំតុបតែងដាក់ជាផ្កាភ្ញីនៅសងខាងផ្លូវ និងដាំផ្កាចម្រុះពណ៌នៅក្បែរច្រកទ្វារផ្លូវឡើងទៅកាន់រម ណីយដ្ឋាន ដ៏ស្រស់ស្អាតនេះផងដែរ។
ហើយនៅថ្ងៃបុណ្យចូលឆ្នាំសកលខាងមុខនេះ គេសង្ឃឹមថា នឹងមានភ្ញៀវទេសចរ ចូលមកលេងកាន់តែច្រើន ខណ:ទឹកជ្រោះមានច្រើនជាន់ ហើយថ្លាឈ្វេង ដូចកញ្ចក់ឆ្លុះមុខ មានសភាពត្រជាក់ស្រេប ពេលភ្ញៀវចុះទៅលេង បំបាត់នូវក្តីកង្វល់ និងធ្វើឱ្យអារម្មណ៍ស្រស់ថ្លា ប្រាជ្ញាភ្លឺស្វាង អាចនឹងធ្វើឱ្យភ្ញៀវខ្លះ ជាសះស្បើយពីជម្ងឺស្ត្រេសថែមទៀតផង។
ម្យ៉ាងវិញទៀត រមណីយដ្ឋានខាងលើ ជាកន្លែងដែលមានទេសភាពស្រស់ស្អាតជាងរមណីយដ្ឋាននានានៅទូទាំងខេត្តប៉ៃលិន ខណ:ដែលផ្លូវចូលទៅលេងកម្សាន្តក៏ស្រួល មានចាក់បេតុង តាំងពីដើមផ្លូវ រហូតដល់កន្លែងចុះលេងទឹកជ្រោះតែម្តង៕
