ក្នុងឱកាស៣ថ្ងៃនៃព្រះរាជពិធីបុណ្យអុំទូក បណ្តែងប្រទីប អកអំបុក និងសំពះព្រះខែឆ្នាំនេះ ខេត្តកោះកុងមានភ្ញៀងទេសចរនាំគ្នាមកលេងកម្សាន្តតាមរមណីដ្ឋាននានា២ម៉ឺន៤ពាន់។ តួលេខនេះកើនឡើងកើនឡើង៤.៤០១នាក់ ស្មើនឹង២១ភាគរយ បើធៀបនឹងរយពេលដូចគ្នាឆ្នាំ២០២០។
លោក សុខ ចាន់គ្រឹះស្នា ប្រធានមន្ទីរទេសចរណ៍ខេត្តកោះកុង ឱ្យដឹងនៅរសៀលថ្ងៃទី២១ ខែវិច្ឆិកាថា ចំនួន ភ្ញៀវទេសចរជាតិមានចំនួន២ម៉ឺន៤៤២៤នាក់ រីឯទេសចរបរទេសចំនួនតែ១៤៤នាក់ប៉ុណ្ណោះ។ ភ្ញៀវទេសចរតាមសហគមន៍មានចំនួនសរុប៦.៩៦២នាក់។
គួរជម្រាបថា តំបន់ទេសចរណ៍ក្នុងខេត្តកោះកុងដែលមានភ្ញៀវទេសចរទៅលេងកម្សាន្តលំហែ រួមមាន៖ សហគមន៍អេកូទេសចរធម្មជាតិព្រៃកោងកាងពាមក្រសោប ចេតិយ៍ឃុនឆាងឃុនផែន ឆ្នេរសមុទ្រប៉ាក់ខ្លង ឆ្នេរនេសាទ សហគមន៍ទេសចរធម្មជាតិអារ៉ែង សហគមន៍ទេសចរធម្មជាតិជីផាត កោះស្តេច តំបន់វិស្សមការតារាសាគរ ជាដើម។
លោក គ្រឹស្នា លើកឡើងដែរថា ដំណើរមកកម្សាន្តអ្នកទេសចរនៅពេលនេះ ធ្វើឡើងក្រោយប្រមុខរាជរដ្ឋាភិបាល បើកភ្លើងខៀវស្តារសេដ្ឋកិច្ចវិស័យទេសចរណ៍ឡើងវិញ ដោយពលរដ្ឋគ្រប់រូបបានចាក់វ៉ាក់សាំងបង្ការការពារជំងឺកូវីដទូទាំងប្រទេសកន្លងទៅមក។
អត្រាមានចំនួនអ្នកទេសចរមកលេងនៅខេត្តកោះកុង ក៏ព្រោះការឆ្លងរីករាលដាលជំងឺកូវីឌ១៩ថយចុះលើសលុប។ តែទោះយ៉ាងណា មន្ត្រីជំនាញផ្នែកទេសចរណ៍អះអាងថា អំឡុងពេលបុណ្យអុំទូកនេះ មានអាជីវកម្មសេវាដឹកជញ្ចូនអ្នកដំណើរកម្សាន្ត អាហារដ្ឋាន ភោជនីយដ្ឋាន ផ្ទះសំណាក់ និងសណ្ឋាគារមួយចំនួនលួចតម្លើងថ្លៃផងដែរ។
បញ្ហាសន្តិសុខសណ្តាប់ធ្នាប់ គឺមានការយកចិត្តទុដាក់ខ្ពស់ពីសំណាក់អាជ្ញាធរ កងកម្លាំងប្រដាប់អាវុធដាក់កម្លាំងយាមប្រចាំការតាមគោលដៅទេសចរណ៍សំខាន់ៗ។ ជាក់ស្តែងវិធានការសុខាភិបាលទប់ស្កាត់ជំងឺកូវីដ តាមសហគមន៍អេកូទេសចរណ៍ធម្មជាតិ អាជីវកម្មផ្តល់សេវាស្នាក់នៅ និងហូបចុក បានចូលរួមអនុវត្តវិធានការសុខាភិបាលបានយ៉ាងល្អប្រសើរ៕
ដោយ៖ មន្ទីរព័ត៌មានខេត្តកោះកុង
