ខេត្តបាត់ដំបង! អាជ្ញាធរបានសម្រេចកំណត់ដាក់ផ្សារកំរៀង ហៅផ្សារ ខេ. អ. ឌី ( KRD ) ក្នុងស្រុកកំរៀងជាតំបន់ក្រហម ក្រោយរកឃើញអាជីវករជាង ១០០នាក់ វិជ្ជមានកូវីដ-១៩ ក្នុងចំណោមអ្នកពាក់ព័ន្ធជិត ៤០០នាក់។
លោក សុខ គឹមខុន អភិបាលស្រុកកំរៀងបានបញ្ជាក់ប្រាប់ឲ្យដឹងថា÷ រយ:ពេលពេញមួយថ្ងៃ កាលពីថ្ងៃទី ០៨ ខែកញ្ញា ឆ្នាំ ២០២១ កន្លងមកនេះ អាជ្ញាធរ រួមជាមួយមន្ត្រីជំនាញបានជំរុញការស្រាវជ្រាវទៅលើក្រុមអាជីវករដែលពាក់ព័ន្ធផ្ទាល់ និងប្រយោលជាមួយនឹងអាជីវករដូចគ្នាដែលមានផ្ទុកជំងឺកូវីដ-១៩ ដោយក្នុងនោះបានតេស្តវត្ថុសំណាក ទាំងអាជីវករ និងទាំងអ្នកភូមិមួយចំនួនទៀតកើនដល់ចំនួន ៣៧៩នាក់ ហើយក្នុងនោះបានរកឃើញអ្នកមានជំងឺកូវីដ-១៩ សរុបចំនួន ១៣៤នាក់បូកទាំងអ្នកឆ្លងជំងឺបំប្លែងថ្មីមួយចំនួនទៀតផងដែរ។
លោកអភិបាលស្រុកបានបន្តថា÷ ប្រភពចម្លងដែលនាំឲ្យកើតមានលើអាជីវករផ្សារក្នុងទីប្រជុំជនស្រុកកំរៀង ខេត្តបាត់ដំបងនេះដោយសារមានអាជីវករម្នាក់បានឆ្លងកាត់ទៅទិញទំនិញនៅក្នុងផ្សារទឹកដីថៃ ហើយបានយកទំនិញទាំងនោះមកដាក់លក់នៅក្នុងផ្សារ KRD រហូតដល់ថ្ងៃទី ០៧ ខែកញ្ញា ទើបមានអាការ:ខុសពីធម្មតា រួចពិនិត្យបានរកឃើញវិជ្ជមានជំងឺកូវីដ-១៩តែម្តង។
ការផ្ទុះឆ្លងរាលដាលឡើងនូវជំងឺកូវីដ១៩សារជាថ្មីនៅតំបន់ព្រំដែនភូមិភាគខាងលិចនៃខេត្តបាត់ដំបងនេះ នៅព្រឹកថ្ងៃទី ០៩ ខែកញ្ញា ឆ្នាំ២០២១នេះ រដ្ឋបាលស្រុកកំរៀងបានសម្រេចដាក់ផ្សារកំរៀង និងមូលដ្ឋានជុំវិញបរិវេណផ្សារមួយចំនួនទៀតជាតំបន់ក្រហមជាបណ្តោះអាសន្ន ដោយហាមដាច់ខាតនូវរាល់ការចេញចូលទៅមក ចាប់ពីថ្ងៃប្រកាសព័ត៌មាន រហូតដល់មានសេចក្តីជូនដំណឹងនាពេលក្រោយ។
ចំពោះមុខបងប្អូនអាជីវករដែលបានរកឃើញជំងឺវិជ្ជមានកូវីដ-១៩ និងវីរុសបំប្លែងថ្មីដែលតា ត្រូវបានក្រុមគ្រូពេទ្យរៀបចំបញ្ជូនទៅសម្រាកព្យាបាលនៅក្នុងមណ្ឌលវិទ្យាល័យកំរៀង ដោយឡែកប្រជាពលរដ្ឋ និងអាជីវករដទៃទៀតដែលបានពិនិត្យធ្វើតេស្តរួចលទ្ធផលអវិជ្ជមានតម្រូវឱ្យពួកគាត់ធ្វើចត្តាឡីស័កនៅផ្ទះរៀងៗខ្លួនរយៈពេល ២១ថ្ងៃ ដោយមានការត្រួតពិនិត្យ និងឃ្លាំមើលពីអាជ្ញាធរមូលដ្ឋានភូមិ-ឃុំ ក៏ដូចជាសមត្ថកិច្ចផងដែរដើម្បីបង្ការទប់ស្កាត់ការឆ្លងរីករាលដាលខ្លាំងចូលក្នុងសហគមន៍បន្ថែមទៀត៕