(ប៉ៃលិន) ៖ លោកជំទាវ បានស្រីមុំ អភិបាលខេត្តប៉ៃលិន បានក្រើនរំលឹកដល់ប្រធាន.អនុប្រធានមន្ទីរអប់រំយុវជន និងកីឡាខេត្ត ឱ្យយក ចិត្តទុកដាក់សម្អាតអគារសិក្សា និងថែរក្សាសម្ភារៈសិក្សា ដែលជារបស់រដ្ឋ ឱ្យបានគង់វង់ មិនត្រូវទុក ចោលនាំឱ្យបាក់បែក ខូចខាតនោះឡើយ ។
លោកជំទាវអភិបាលខេត្តថ្លែងដូចនេះ នាថ្ងៃទី២៦ ខែមិថុនា ឆ្នាំ២០២១ ក្ក្នុងកិច្ចចុះពិនិត្យមណ្ឌលចត្តាឡីស័កនិងមណ្ឌលព្យាបាលអ្នកជំងឺកូវិដ.១៩ ទាំង៤កន្លែង ស្ថិតនៅក្រុងប៉ៃលិន១កន្លែងនិងនៅ ស្រុកសាលាក្រៅចំនួន៣កន្លែង ។
លោកជំទាវ បាន ស្រីមុំ អភិបាលខេត្ត បានមានប្រសាសន៍ណែនាំដល់លោក តង់ ធារ៉ា ប្រធានមន្ទីរអប់រំយុវជន និងកីឡាខេត្ត យកចិត្តទុកដាក់ ថែរក្សាតុ ទូ កៅ អី ដែលជាសម្ភារៈ ការិយាល័យរបស់សាលារៀនទាំងអស់ ដោយរៀបចំទុកដាក់ ឱ្យបានស្រួលបួល មិនត្រូវយកសម្ភារ:មានតំលៃ ទាំងនោះ ទៅទុកចោលនៅខាងក្រៅសាលា ដែលនាំឱ្យត្រូវទឹក បណ្តាលឱ្យពុកផុយខូចខាតរបស់រដ្ឋ ដែលជាអំណោយរបស់សម្តេចតេជោ ហ៊ុន សែន នាយករដ្ឋមន្ត្រីដែលសម្តេចតែងតែគិតគូរមិនឲ្យលោកគ្រូអ្នកគ្រូនៅតាមសាលារៀននានាខ្វះខាតឡើយនេះជាទឹកចិត្តដ៍ថ្លៃថ្លារបស់សម្តេច ក្នុងនាមយើងជាអ្នកប្រើប្រាស់ត្រូវយកចិត្តទុកដាក់សម្ភារ:ទាំងនោះឲ្យដូចជារបស់ផ្ទាល់ខ្លួនយើង។
លោកជំទាវ អភិបាលខេត្ត បន្តទៀតថា ទោះបីជាសាលារៀន ក្នុងខេត្តប៉ៃលិនទាំងអស់ ត្រូវបានបិទទ្វារ ក៏ត្រូវតែដាក់វេណ ឱ្យលោកគ្រូ អ្នកគ្រូបោសសម្អាត បន្ទប់សាលារៀនរបស់ខ្លួនឱ្យនៅស្អាតល្អ ដោយមិនត្រូវទុកចោល នាំឱ្យពុកផុយ ឬមានធូលីដី ធ្វើឱ្យខូចខាតសម្ភារសិក្សាទាំងនោះឡើយ ។
លោកជំទាវអភិបាលខេត្ត បានបញ្ជាក់ថា ដោយអនុវត្តតាមការណែនាំ និងវិធានការយ៉ាងម៉ឺងម៉ាត់ក្នុងការទប់ស្កាត់ការឆ្លងរាលដាលនៃជម្ងឺកូវីដ-១៩ របស់ប្រមុខរាជរដ្ឋាភិបាលកម្ពុជា និងក្រសួងសុខាភិបាល រដ្ឋបាលខេត្តប៉ៃលិន បានរៀបចំមណ្ឌលចត្តាឡីស័កជាច្រើនកន្លែង សម្រាប់ប្រជាពលរដ្ឋដែលប៉ះពាល់ផ្ទាល់ជាមួយអ្នកជម្ងឺកូវីដ-១៩ និងអ្នកដែលទើបតែវិលត្រលប់មកពីតំបន់ប្រឈមនានា តាមបណ្តារាជធានី/ខេត្ត ។
ក្នុងករណីសង្ស័យ បន្ទាប់ពីក្រុមគ្រូពេទ្យជំនាញពិនិត្យសុខភាព ជាពិសេសពលករដែលបានវិលត្រឡប់មកពីក្រៅប្រទេស ព្រមទាំងបានរៀបចំក្រុមការងារ ធ្វើការចម្អិនម្ហូបអាហារ សម្រាប់បងប្អូនដែលកំពុងធ្វើចត្តាឡីស័កផងដែរ ។
ជាចុងក្រោយលោកជំទាវបានណែនាំដល់លោកប្រធានមន្ទីរ សូមចូលរួមរៀបចំសម្អាតអនាម័យបរិស្ថានក្នុងបរិវេណសាលារៀន និងនៅតាមបន្ទប់រៀននីមួយៗ ឱ្យបានស្អាតល្អ និងមានសោភណ្ឌភាព ។ បើទោះបីជាវិស័យអប់រំ យុវជន និងកីឡា ត្រូវបានផ្អាកការសិក្សារៀនសូត្រទូទាំងប្រទេសដោយសារជំងឹកូវីដ១៩ក៍ដោយ តែយើងមិនត្រូវភ្លេច ការសម្អាតបរិស្ថានសាលារៀននោះឡើយ៕