ប្រជាពលរដ្ឋ រស់នៅក្នុងភូមិបរយ៉ាខា ភូមិបរតាំងស៊ូ និងភូមិអូរស្ងួត សង្កាត់បរយ៉ាខា ក្រុងប៉ៃលិន ខេត្តប៉ៃលិន បាននាំគ្នារអ៊ូរទាំ រឿងឈ្មួញ៣នាក់ បានយកគ្រឿងចក្រទៅជីកកកាយដី ដឹកប្រណាំងគ្នានៅលើផ្លូវក្រាលកៅស៊ូ យកទៅលក់ដូរនៅតាមភូមិ បណ្តាលឱ្យហុយចូលផ្ទះ ពួកគាត់ លំបាកក្នុងការរស់នៅ អត់ឃើញម្ចាស់រថយន្តបូមទឹកស្រោច ឬយកស្បៃគ្របដីនៅលើរថយន្តដឹកដីនោះឡើយ ពោលគឺចំហរធ្លុងតែម្តង ។
ហេតុការណ៍ឈ្មួញ៣នាក់ យកគ្រឿងចក្រទៅជីកកកាយដី ចំនួន៣កន្លែង ដឹកលក់យ៉ាងគគ្រឹកគគ្រេងនេះ បានកើតឡើងកាលពីវេលាម៉ោង៣ និង៣០នាទីរសៀលថ្ងៃទី១៣ ខែឧសភា ឆ្នាំ២០២១ ស្ថិតនៅក្នុងភូមិបរយ៉ាខា និងភូមិបរតាំងស៊ូ សង្កាត់បរយ៉ាខា ក្រុងប៉ៃលិន ខេត្តប៉ៃលិន ។
ប្រភពព័ត៌មានពីប្រជាពលរដ្ឋ ដែលមានផ្ទះនៅក្បែរផ្លូវក្រាលកៅស៊ូខាងលើ បានរៀបរាប់ទាំ ងត្អូញត្អែរឱ្យដឹងថា ៖ មានក្រុមឈ្មួញ៣នាក់ បាននាំគ្នាសម្រុកជីកកកាយដី ដឹកលក់យ៉ាងគគ្រឹកគ គ្រេង ហើយថែមទាំងបើករថយន្តល្បឿនលឿន ដូចបើកបរប្រណាំងប្រជែងគ្នា នៅលើដងផ្លូវចង្អៀត ប្រញាប់យកទៅលក់នៅតាមភូមិ គឺអស់រយ:ពេលជិត១០ថ្ងៃមកហើយ បណ្តាលឱ្យកំទេចធូលីដីហុយចូលផ្ទះសម្បែង ស្ទើរដកដង្ហើមមិនរួច បណ្តាលឱ្យកើតជំងឺផ្តាសាយ ក្អក ជាពិសេសពួកគាត់ព្រួយបារម្ភចំពោះសុវត្ថិភាព ខណ:ឃើញរថយន្តដឹកដីទាំងនោះបើកក្នុងល្បឿន លឿនខ្លាំង ទាំងពេ លមានដីនៅលើរថយន្ត និងពេលបើកបររថយន្តទទេ ឆ្ពោះទៅកន្លែងដឹកដីជាដើម ។
ចំណែកពេល ដែលមានភ្លៀងធ្លាក់ម្តងៗ បណ្តាលឱ្យកំទេចដីនោះក្លាយទៅជាភក់ជ្រាំ លុះអ្នកភូមិបើកបរម៉ូតូចេញចូលតាមដងផ្លូវនេះ បណ្តាលឱ្យរអិលស្ទើរតែដួលម៉ូតូបង្កគ្រោះថ្នាក់ផងដែរ ។ ពួកគាត់ក៏សំណូមពរឱ្យម្ចាស់គ្រឿងចក្រទាំង៣នាក់ខាងលើ ប្រាប់តៃកុងឱ្យបន្ថយល្បឿន ព្រោះជាកន្លែងផ្លូវតូចចង្អៀត ហើយមានមនុស្សចេញចូលច្រើន ។ ម្យ៉ាងវិញទៀត សូមឱ្យម្ចាស់រថយន្តគ្របដីខាងលើ ពេលដឹកយកទៅលក់ដូរនៅតាមភូមិ ដើម្បីកុំឱ្យហុយ ឬធ្លាក់ទៅលើផ្លូវថ្នល់នាំឱ្យមានបញ្ហាដល់អ្នកធ្វើដំណើរលើផ្លូវជាមួយគ្នា ។
ពាក់ព័ន្ធនឹងបញ្ហានេះ លោក សុខ សួន ប្រធានមន្ទីររ៉ែ និងថាមពលខេត្តប៉ៃលិន បានឱ្យដឹងថា ៖ ឈ្មួញទាំង៣នាក់ខាងលើ គឺគេបានសុំច្បាប់ទៅខាងមន្ទីរលោកអស់ហើយ ។ តែបើសិនជាមានការដឹកដីកំពប់ទៅលើផ្លូវថ្នល់ ឬមានការហុយធូលីទៅលើផ្ទះប្រជាពលរដ្ឋ ខាងលោកចាត់ឱ្យមន្ត្រីជំនាញចុះទៅពិនិត្យមើល ដើម្បីធ្វើការអប់រំណែនាំ ។
ចំណែកលោក ស៊ុន យី អភិបាលក្រុងប៉ៃលិន ក៏បានឱ្យដឹងដែរថា ៖ ខាងលោក ក៏នឹងចាត់ឱ្យមន្ត្រីជំនាញចុះទៅពិនិត្យមើល ព្រមទាំងណែនាំឱ្យធ្វើតាមច្បាប់ទម្លាប់ត្រឹមត្រូវ ជៀសវាងបង្កផលប៉ះពាល់ដល់បរិស្ថាន និងធ្លាក់កំទេចធូលីដីទៅលើផ្លូវថ្នល់ ប៉ះពាល់ដល់ការធ្វើដំណើរផងដែរ ៕