សេចក្តីរាយការណ៍បានបញ្ជាក់អោយដឹងថា ខេត្តទាំង៥នោះគឺខេត្តកណ្តាល , ខេត្តកំពង់ឆ្នាំង ,ខេត្តឧត្តរមានជ័យ, ខេត្តបាត់ដំបងនិងខេត្តត្បូងឃ្មុំ។
សេចក្តីរាយការណ៍ពីខេត្តកណ្តាល កាលពីយប់ថ្ងៃទី៥ ខែឧសភា ឆ្នាំ២០២១មានភ្លៀងធ្លាក់ដោយលាយឡំ និងខ្យល់កន្ត្រាក់បានបណ្តាលឲ្យប៉ះពាល់ផ្ទះប្រជាពលរដ្ឋចំនួន ៨ខ្នង បានរងការខូចខាត។
ខេត្តកំពង់ឆ្នាំង៖ មានភ្លៀងធ្លាក់និងខ្យល់កន្ត្រាក់បំផ្លាញ លំនៅឋានប្រជាពលរដ្ឋ ចំនួន២៨ខ្នង បណ្តាលឲ្យ របើកដំបូលផ្ទះរងការខូចខាត។
ខេត្តឧត្តរមានជ័យ មានភ្លៀងធ្លាក់ លាយឡំ និងខ្យល់កន្ត្រាក់បានបណ្ដាលឲ្យប៉ះពាល់ផ្ទះប្រជាពលរដ្ឋចំនួន ២៦ខ្នង បានរងការខូចខាត ស្ថិតនៅភូមិប្រាសាទល្បើក បេង ទំនប់ចាស់ ឃុំបេង ស្រុកបន្ទាយអំពិល ។
ខេត្តបាត់ដំបង មានករណីភ្លៀងធ្លាក់លាយឡំជាមួយនឹងខ្យល់កន្ត្រាក់ បណ្ដាលអោយខូចខាតផ្ទះរបស់ប្រជាពលរដ្ឋចំនួន ២៥ខ្នង ក្នុងនោះខូចខាតដំបូលស័ង្កសី សរុបចំនួន ១៤៦សន្លឹក នៅស្រុកសំពៅលូនប៉ះពាល់២ឃុំគឺ ឃុំសន្តិភាព និងឃុំជ្រៃសីមា។
ខេត្តត្បូងឃ្មុំ ផ្ទះប្រជាពលរដ្ឋ១៤ខ្នង រងការខូចខាតដោយសារខ្យល់កន្ត្រាក់ មាននៅទីតាំងភូមិបឹងកាង ឃុំព្រះធាតុ ស្រុកអូររាំងឪ ខូចខាតដួលរលំរោងអាជីវកម្មឡឥដ្ឋចំនួន១ខ្នង, ខូចខាតដំបូលនិងជញ្ជាំងផ្ទះចំនួន៨ខ្នង, ខូចខាតដំបូលផ្ទះចំនួន៤ខ្នង,ខូចខាតផ្ទះទាំងស្រុងចំនួន១ខ្នង។ មិនមានសេចក្តីរាយការណ៍ពីមនុស្សណាម្នាក់បានរងរបួសនោះឡើយ។
ក្រសួងធនធានទឹកនិងឧតុនិយម បានដាស់តឿនប្រជាពលរដ្ឋទាំងអស់ត្រូវប្រុងប្រយ័ត្ន ចំពោះបាតុភូតផ្គររន្ទះ និងខ្យល់កន្ត្រាក់ក្នុងសប្តាហ៍នេះ៕
