បើតាមសមាគមឧស្សាហកម្មស៊ីម៉ងត៍កម្ពុជា រហូតមកដល់ពេលនេះប្រទេសកម្ពុជាមានក្រុមហ៊ុនផលិតស៊ីម៉ងត៍ចំនួន ០៥ កំពុងដំណើរការ។ ខេត្តកំពតបានក្លាយជាមជ្ឈមណ្ឌលផលិតស៊ីម៉ងត៍ដ៏ធំបំផុត ខណៈដែលរោងចក្រផលិតស៊ីម៉ងត៍ចំនួន ០៤ បានបោះទីតាំងវិនិយោគក្នុងខេត្តដ៏សក្ដានុពលនេះ។
បើតាមឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ក្នុងមួយឆ្នាំៗកម្ពុជាអាចផលិតស៊ីម៉ងត៍បានដោយខ្លួនឯង ប្រមាណជាង ៨លានតោន។ ខេត្តកំពតមានរោងចក្រចំនួន ០៤ និង១ រោងចក្រទៀត គឺនៅខេត្តបាត់ដំបង។
តាមរយៈរោងចក្រផលិតស៊ីម៉ងត៍ របស់កម្ពុជាទាំង ៥ បានធ្វើឲ្យកម្ពុជាចំណេញប្រាក់ប្រមាណ ៥០០ ដុល្លារអាមេរិក ពីការទិញស៊ីម៉ងត៍ពីក្រៅប្រទេស។
បើតាមការសិក្សាស្រាវជ្រាវ មានតែខេត្តចំនួន ៣ ប៉ុណ្ណោះនៅក្នុងប្រទេសកម្ពុជាដែលមានវត្ថុធាតុដើម សម្រាប់ផលិតស៊ីម៉ងត៍ រួមមានខេត្តកំពត បាត់ដំបង និងបន្ទាយមានជ័យ៕