ខេត្តបាត់ដំបង៖ ជនសង្ស័យម្នាក់ក្នុងចំណោមបក្សពួកគ្នាពីរនាក់ត្រូវបានកម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបាត់ដំបងចាប់ឃាត់ខ្លួនជាប់ពាក់ព័ន្ធទៅហ្នឹងករណីហិង្សាដោយចេតនាមានស្ថានទម្ងន់ទោស។
លោក វរសេនីយ៍ឯក ឈឿង គឹមសុង នាយការិយាល័យ នគរបាលព្រហ្មទណ្ឌកម្រិតស្រាលបានអោយដឹងថា ក្រោយទទួលបានបណ្តឹងពីខាងជនរងគ្រោះភ្លាម លោកបានដឹកនាំកម្លាំងក្រុមអន្តរាគមន៍ បង្ការ បង្ក្រាប ចុះប្រតិបត្តិការស្រាវជ្រាវរហូតនៅវេលាម៉ោង ១៨និង១៥នាទី ថ្ងៃទី ០១ ខែ កុម្ភៈ ឆ្នាំ ២០២១ ទើបកំណត់បានមុខសញ្ញានឹង បាន ធ្វើការ នាំខ្លួន ជនសង្ស័យ ០១ នាក់ ឈ្មោះ សើរ សារឿត ហៅ ជោ ភេទប្រុស អាយុ ២២ ឆ្នាំ មានទីលំនៅ ភូមិ ចំការសំរោង ១ សង្កាត់ ចំការសំរោង ក្រុងបាត់ដំបង ។
លោកបានបន្តថា ក្រោយធ្វើការឃាត់ខ្លួនយកមកសាកសួរ ជនសង្ស័យខាងលើបានសារភាពថាកាលពី ថ្ងៃទី ២៩ ខែ មករា ឆ្នាំ ២០២១ វេលាម៉ោង ០៣និង១០ នាទី នៅ ចំណុច ភូមិ រតនៈ សង្កាត់ រតនៈ ក្រុងបាត់ដំបង ខេត្ត បាត់ដំបង ខ្លួននិងបក្សពួកម្នាក់ទៀតបានធ្វើសកម្មភាពដោយជិះម៉ូតូឌុប គ្នាទៅកាប់នឹងគប់ដុំថ្ម ទៅ លើ ឈ្មោះ ពេជ្រ គឹម ឡុង ភេទប្រុស អាយុ ២៨ ឆ្នាំ មានទីលំនៅ ភូមិ រតនៈ សង្កាត់ រតនៈ ក្រុងបាត់ដំបង បណ្តាល ឲ្យ រងរបួស ក្បាល ជង្គង់ និង កែង ដៃ ខាង ឆ្វេង រួចបាននាំគ្នាជិះម៉ូតូគេចខ្លួន តែសំណាងមិនល្អត្រូវបានសមត្ថកិច្ចតាមចាប់ខ្លួនបានតែម្តង។
លោកប្រធានការិយាល័យបានបញ្ជាក់បន្ថែមថា នៅក្នុងកិច្ចប្រតិបត្តិការឃាត់ខ្លួនជនសង្ស័យខាងលើ សមត្ថកិច្ចបានដកហូតវត្ថុតាង- ម៉ូតូ ០១ គ្រឿង ម៉ាក ហុងដា វេវ ១០០ ពណ៌ ខ្មៅ ក្រហម ពាក់ស្លាកលេខ បាត់ដំបង 1B 9857 ដែលជាមធ្យោបាយជិះធ្វើសកម្មភាពផងដែរ។
ហើយរហូតមកដល់ពេលនេះជនសង្ស័យរួមជាមួយវត្ថុតាងត្រូវបានការិយាល័យជំនាញកំពុងតែធ្វើការកសាងសំណុំរឿង ដើម្បី បញ្ជូន ទៅ សាលាដំបូង ខេត្ត បាត់ដំបង ចាត់ការ បន្ត តាមនីតិវិធី៕
