របាយការណ៍របស់បេឡាជាតិសន្តិសុខសង្គមនៃក្រសួងការងារនិងបណ្ដុះបណ្តាលវិជ្ជាជីវៈ ប្រចាំឆ្នាំ២០២០ លើកឡើងថា បើទោះបីស្ថានភាពកូវីដធ្វើឱ្យពិភពលោក បានបង្ហាញពីឱនភាពសេដ្ឋកិច្ច យ៉ាងណាក៏ដោយ ដោយឡែកបេឡាជាតិសន្តិសុខសង្គមកម្ពុជា មិនទាន់បង្ហាញពីផលប៉ះពាល់នៃប្រាក់ឧបត្ថម្ភដល់កម្មករនិយោជិតនៅឡើយទេ។ នោះគឺក្នុងឆ្នាំ២០២០ កម្មការិនីសម្រាលកូន ដែលជាសមាជិក ប.ស.ស ទទួលបានប្រាក់ឧបត្ថម្ភរបស់រាជរដ្ឋាភិបាល កើនឡើងជាងឆ្នាំ២០១៩។
ប.ស.ស បានប្រកាសថា ចាប់តាំងពីថ្ងៃទី០១ ខែមករា ឆ្នាំ២០២០ រហូតមកដល់ត្រឹមថ្ងៃទី៣១ ខែធ្នូ ឆ្នាំ២០២០កន្លងទៅនេះ ប្រាក់ឧបត្ថម្ភបន្ថែមរបស់រាជរដ្ឋាភិបាល បានបើកផ្តល់ដល់កម្មករនិយោជិតជាស្ត្រីសម្រាលកូនចំនួន ៨០ ៤៩៩នាក់ ក្នុងនោះចំនួនកូនមាន ៨១ ០៣១ នាក់ ដោយចំណាយទឹកប្រាក់អស់ប្រមាណជាង ៣២ពាន់លានរៀល តាមរយៈបេឡាជាតិសន្តិសុខសង្គម។ បើប្រៀបធៀបកាលពីឆ្នាំ២០១៩ និងឆ្នាំ២០១៨ កន្លងទៅឃើញថា ស្ដ្រីសម្រាលកូនមានការកើនឡើងជាបន្តបន្ទាប់ ដែលក្នុងឆ្នាំ២០១៩ ស្ដ្រីសម្រាលកូនមានចំនួន៧៧ ៤៤៩នាក់ មានចំនួនកូនសរុប ៧៧ ៩៦៦នាក់់ និងឆ្នាំ២០១៨ មានស្ដ្រីសម្រាលកូនចំនួន ៦៥ ០៥៤នាក់ មានចំនួនកូនសរុប ៦៥ ៥៣៤នាក់។
ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានលើកឡើងពីការយកចិត្តទុកដាក់បំផុត ពីសំណាក់ប្រមុខរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា ចំពោះសុខុមាលភាព និងជីវភាពរស់នៅរបស់ប្រជាពលរដ្ឋ និងបងប្អូនកម្មករនិយោជិត តាមរយៈក្រសួងការងារ និងបណ្តុះបណ្តាលវិជ្ជាជីវៈ ដែលមានបេឡាជាតិសន្តិសុខសង្គម (ប.ស.ស.) ជាសេនាធិការ ។
ជាមួយគ្នានេះដែរ រាជរដ្ឋាភិបាលកម្ពុជា បានដាក់ចេញជាសាធារណៈសម្រេចផ្តល់ប្រាក់ឧបត្ថម្ភ ដល់កម្មការិនីដែលទើបសម្រាលកូនទាំងក្នុង និងក្រៅប្រព័ន្ធ ឱ្យទទួលបានគោលរបបប្រាក់ឧបត្ថម្ភបន្ថែមរបស់រាជរដ្ឋាភិបាល ដែលក្នុងនោះ៖ – សម្រាលបានកូនម្នាក់ ទទួលបាន ៤០ម៉ឺនរៀល – សម្រាលបានកូនភ្លោះពីរ ទទួលបាន ៨០ម៉ឺនរៀល – សម្រាលបានកូនភ្លោះបី ទទួលបាន ១លាន ២០ម៉ឺនរៀល ដែលត្រូវបានបើកផ្តល់ជូន តាមរយៈបេឡាជាតិសន្តិសុខសង្គម (ប.ស.ស.) ។
ប.ស.ស លើកឡើងថា នេះដោយសារតែការដឹកនាំដ៏ឈ្លាសវៃរបស់សម្ដេច អគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា បានដាក់ចេញនូវផែនការច្បាស់លាស់ទប់ស្កាត់ប្រកបដោយប្រសិទ្ធភាពខ្ពស់ ក្នុងការការពារមេរោគដល់សាហាវមួយនេះ។
ប.ស.ស បន្ថែមថា បច្ចុប្បន្ននេះ ប្រមុខរាជរដ្ឋាភិបាលនៅតែបន្តអំពាវនាវឱ្យប្រជាជនអនុវត្តន៍នូវវិធានការរបស់ក្រសួងសុខាភិបាលឱ្យជាប់ជានិច្ច ដើម្បីសុខភាពសង្គមទាំងមូល គ្មានការឆ្លងមកលើប្រជាជនកម្ពុជា។
សូមរម្លឹកថា ចាប់តាំងពីថ្ងៃទី១ ខែមករា ឆ្នាំ២០១៨ រាជរដ្ឋាភិបាល បានអនុវត្តនូវកម្មវិធីផ្តល់ប្រាក់ឧបត្ថម្ភ ដល់កម្មការិនី ដែលទើបសម្រាលកូនទាំងក្នុង និងក្រៅប្រព័ន្ធ៕
