ខេត្តបាត់ដំបង៖ អគ្គិភ័យមួយបានឆាបឆេះផ្ទះ១ខ្នងទាំងស្រុងបង្កការភ្ញាក់ផ្អើលដល់អ្នកស្រុក ក៏ដូចជាសមត្ថកិច្ចចុះចេញអន្តរាគមន៍ពន្លត់។
សមត្ថកិច្ចបានអោយដឹងថា ហេតុការណ៍គ្រោះអគ្គិភ័យខាងលើនេះបានកើតឡើងនៅវេលាម៉ោង២១និង១០នាទី ថ្ងៃទី ៣០ ខែវិច្ឆិកា ឆ្នាំ២០២០ នៅចំណុចក្រុមទី០៣ ស្ថិតក្នុងភូមិជាមន្ត្រី ឃុំត្រែង ស្រុករតនមណ្ឌល ខេត្តបាត់ដំបង ។
ផ្ទះដែលត្រូវអគ្គិភ័យឆាបឆេះខាងលើមានទំហំ ៥ម៉ែត្រx១០ម៉ែត្រ សង់អំពីឈើ ជញ្ជាំងស័ង្កសី និងដំបូលប្រក់ស័ង្កសី (ឆេះទាំងស្រុង)ដែលមានម្ចាស់ឈ្មោះ កែវ វិច្ចរ៉ា ភេទស្រី អាយុ២៧ឆ្នាំ រស់នៅចំណុចកើតហេតុខាងលើ។
សមត្ថកិច្ចបានបញ្ជាក់ថា ក្នុងហេតុការណ៍គ្រោះអគ្គិភ័យខាងលើនេះដែរ ក្រោយទទួលបានព័ត៌មានភ្លាមសមត្ថកិច្ចជំនាញ បានចេញរថយន្តពន្លត់អគ្គិភ័យចំនួន០១គ្រឿងចុះជួយអន្តរាគមន៍បាញ់ពន្លត់ទាន់ពេលវេលាដោយប្រើប្រាស់ទឹកអស់ចំនួនមួយឡានរហូតទទួលបានជោគជ័យ ដោយមិនបង្កអោយឆេះរាលដាលឆ្លងទៅកន្លែងផ្សេងនិងផ្ទះអ្នកជិតខាង ហើយក៏មិនបណ្តាលអោយមាននរណាម្នាក់រងគ្រោះថ្នាក់ឡើយ។
ក្រោយពេលកើតហេតុសមត្ថកិច្ចជំនាញបានចុះទៅធ្វើរការសាកសួរពិនិត្យជំវិញកន្លែងកើតហេតុ និងបានសន្និដ្ឋានថា មូលហេតុដែលផ្តើមអោយមានអគ្គិភ័យកើតឡើងនេះ គឺបណ្តាលមកពីឆ្លងចរន្តអគ្គិសនី ចំណែកការខូចខាតវិញឃើញថា ផ្ទះឆេះរងការខូចខាតអស់ទាំងស្រុងរួមនឹងសម្ភារៈប្រើប្រាស់មួយចំនួនរួមមាន! -ម៉ូតូម៉ាកហុងដាឌ្រីមសេរីឆ្នាំ២០១៣ចំនួន០១គ្រឿង - គោយន្តកន្ត្រៃចំនួន០១គ្រឿង - ទូរទឹកកកចំនួន០១គ្រឿង រួមនឹងសម្ភារៈប្រើប្រាស់មួយចំនួនទៀត៕
