ព្យុះ និងទឹកជំនន់ នៅភាគកណ្តាលប្រទេសវៀតណាម បានធ្វើឱ្យប្រជាជន១៧នាក់ស្លាប់ និង១៣នាក់ទៀតបាត់ខ្លួន ខណៈអាជ្ញាធរវៀតណាមអះអាងថា គ្រោះមហន្តរាយមួយនេះទំនងជាមិនទាន់បញ្ចប់នោះទេ។
សារព័ត៌មាន CNA ចេញផ្សាយនាព្រឹកថ្ងៃទី១២ ខែតុលា ឆ្នាំ២០២០ នេះថា តាមការព្យាករណ៍ រយៈពេលប៉ុន្មានថ្ងៃខាងមុខ ភាគកណ្តាលប្រទេសវៀតណាម នឹងត្រូវវាយប្រហារដោយព្យុះទីហ្វុង លីនហ្វា (Linfa) ធ្វើឲ្យមានភ្លៀងធ្លាក់ជោគជាំ ខ្យល់បោកបក់ខ្លាំង និងគ្រោះទឹកជំនន់។
យ៉ាងណាក៏ដោយ ក្រុមឆ្មាំសមុទ្រវៀតណាម បានព្យាយាមជួយសង្គ្រោះពលរដ្ឋចេញពីកន្លែងដែលជាប់គាំង ដោយប្រើប្រាស់ឧទ្ធម្ភាគចក្រ និងមធ្យោបាយផ្សេងទៀតដែលអាចទៅរួច ជាពិសេសនៅក្នុងខេត្តក្វាងទ្រី (Quang Tri) ដែលបាននិងកំពុងទទួលរងគ្រោះធ្ងន់ធ្ងរជាងគេ៕