ឯកអគ្គរាជទូតកម្ពុជា ប្រចាំប្រទេសវៀតណាម បានចេញសេចក្តីជូនដំណឹង ដោយលើកយកអត្ថបទកាសែតវៀតណាម Vietnam News ដែលបង្ហាញថា នៅខែមីនានេះ សីតុណ្ហភាពនៅទីក្រុងហូជីមិញ បានកើនឡើងដល់ ៣៤-៣៧ អង្សាសេ។ ឯកអគ្គរាជទូតកម្ពុជា បានប្រកាសឲ្យនិស្សិត សិក្ខាកាម យោធា នគរបាល និងបងប្អូនប្រជាពលរដ្ឋខ្មែរ កំពុងសិក្សា ស្នាក់នៅ ឬមានវត្តមាននៅទីក្រុងហូជីមិញ បង្កើនការប្រុងប្រយ័ត្ន នឹងអាកាសធាតុក្តៅខ្លាំងនេះ។
តាមសេចក្តីជូនដំណឹង សីតុណ្ហភាព នៅទីក្រុងហូជីមិញ អាចនឹងក្តៅខ្លាំង នៅខែមេសា និងខែឧសភា។ ក្នុងនោះ វេជ្ជបណ្ឌិត លើកឡើងថា ជំងឺបណ្តាលមកពីសីតុណ្ហភាពក្តៅខ្លាំង ដូចជា ជំងឺដាច់សរសៃឈាមខួរក្បាល ការអស់កម្លាំង រមួលក្រពើ ឬក្តាមកាច់ជើង អាចកើតមានលើមនុស្សគ្រប់រូប ពិសេសមនុស្សចាស់ ក្មេង និងមនុស្សធាត់ខ្លាំង។
វេជ្ជបណ្ឌិតនៅមន្ទីរពេទ្យអន្តរជាតិនៃទីក្រុងនេះ និយាយថា អាកាសធាតុក្តៅបង្កឲ្យមានហានិភ័យដល់ប្រព័ន្ធដង្ហើម ព្រោះមនុស្សភាគច្រើន នឹងបើកកង្ហារដោយពេញល្បឿន និងបើកម៉ាស៊ីនត្រជាក់ក្នុងសីតុណ្ហភាពទាប នាំឲ្យបំពង់ក និងច្រមុះស្ងួត។ ពេលភ្នាសខាងក្នុងនៃផ្លូវដង្ហើមស្ងួត ធ្វើឲ្យពួកបាក់តេរី និងវីរុសងាយប្រជ្រៀតចូល បង្កឲ្យមានជំងឺ។
ឯកអគ្គរាជទូតកម្ពុជា ប្រចាំប្រទេសវៀតណាម បានណែនាំឲ្យប្រជាពលរដ្ឋ ត្រូវទទួលទានបន្លែ និងផ្លែឈើឲ្យបានច្រើន ពាក់មួកមានហាមធំៗ និងស្លៀកពាក់សម្លៀកបំពាក់ការពារ និងត្រូវប្រើរបាំងការពារពន្លឺព្រះអាទិត្យ ពេលចេញក្រៅ។ ត្រូវទទួលទានទឹកយ៉ាងហោចណាស់ ១,៥លីត្រ ទៅ ២លីត្រ ក្នុងមួយថ្ងៃ ហើយត្រូវទទួលទាន់ទឹកច្រើនជាងនេះ បើលេងកីឡា។ ដោយឡែក នៅរយៈពេល ៣ថ្ងៃខាងមុខនេះ សន្ទស្សន៍នៃUV នៅទីក្រុងហូជីមិញ នឹងឡើងដល់ ១០-១១ មានន័យថា មានហានិភ័យខ្ពស់ណាស់ បើត្រូវពន្លឺថ្ងៃដោយមិនបានការពារ៕