ទិន្នន័យពីអគ្គនាយកដ្ឋានគយ និងរដ្ឋាករកម្ពុជា បង្ហាញថា គិតក្នុងរយៈពេល៦ ខែ ឆ្នាំ២០២០ នេះ កម្ពុជាទទួលបានទឹកប្រាក់ប្រមាណជាង ១,៣ ពាន់លានដុល្លារ ពីការនាំចេញគ្រឿងអលង្ការ និងត្បូង ទៅទីផ្សារអន្តរជាតិ។
របាយការណ៍ឱ្យដឹងទៀតថា ចាប់ពីខែមករា ដល់ខែមិថុនា ឆ្នាំ២០២០ កម្ពុជាបាននាំចេញគ្រឿងអលង្ការ និងត្បូងមានតម្លៃទៅក្រៅប្រទេសក្នុងតម្លៃសរុប ១,៣១៤ លានដុល្លារ ស្មើនឹងទម្ងន់សរុប ៣៦,៨០៣ គីឡូក្រាម ឬ ២៥,៥៦៣ គ្រឿង។
ទន្ទឹមគ្នានេះក្នុងរយៈពេល ៦ ខែ ឆ្នាំនេះ កម្ពុជាក៏បាននាំចូលគ្រឿងអលង្ការ និងត្បូងមានតម្លៃពីបរទេសក្នុងតម្លៃប្រមាណ ៣៨៣,៣២ លានដុល្លារស្មើ ២៨ ៨៤៤ គីឡូក្រាម ឬ ៦៤០ ២២២ គ្រឿង។ ចំណែកក្នុងឆ្នាំ ២០១៩ ទាំងមូល ការនាំចូលមានតម្លៃសរុប ១៤៩,៥៧ លានដុល្លារ ស្មើនឹងទម្ងន់ ៥៧ ៦៣២ គីឡូក្រាម ឬ ១ ០៤៣ ៧២៧ គ្រឿង៕
