អាជ្ញាធរជាតិប្រយុទ្ធប្រឆាំងគ្រឿងញៀន គ្រោងដុតបំផ្លាញគ្រឿងញៀនជាច្រើនប្រភេទចំនួន សរុបជាង ៥០០ គីឡូក្រាម នៅថ្ងៃ ២៦ ខែមិថុនា ឆ្នាំ២០២០ នៅមជ្ឈមណ្ឌលកោះពេជ្រ ត្រូវនឹងថ្ងៃទិវាប្រយុទ្ធប្រឆាំងគ្រឿងញៀនអន្តរជាតិ។ នេះបើតាមការបញ្ជាក់ពីឯកឧត្តម នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិទទួលផែនគ្រឿងញៀន។
ឯកឧត្តម នាយឧត្តមសេនីយ៍ បានថ្លែងថា លោកថ្លែងបន្តថា កម្មវិធីនេះត្រូវបានរៀបចំតូចល្មមដែលនឹងមានអ្នកចូលរួមប្រមាណជាង ២០០ នាក់ ដោយសារមិនអាចប្រមូលផ្ដុំគ្នាច្រើនបានក្នុងអំឡុងពេលបង្ការជំងឺឆ្លងកូវីដ ១៩ ក្នុងឆ្នាំ ២០២០ នេះ។
យោងតាមរបាយការណ៍របស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ បានឲ្យដឹងថាពី លទ្ធផលអនុវត្តច្បាប់បង្ក្រាបបទល្មើសគ្រឿងញៀនចាប់ពីថ្ងៃទី ១ ខែមករា ដល់ថ្ងៃទី ២៣ ខែមិថុនា ឆ្នាំ ២០២០ នេះមានចំនួន ៥ ១៧២ ករណី ដោយឃាត់មនុស្សចំនួន ១០ ២១៣ នាក់ (ស្រី ៦៣១ នាក់) ក្នុងនោះមានជនបរទេស ១៣៨ នាក់ (ស្រី ២១ នាក់) ដែលមាន ៧ សញ្ជាតិ៕
