ឯកឧត្តមឧបនាយករដ្ឋមន្ដ្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានបញ្ជាក់ប្រាប់រដ្ឋមន្ត្រីការបរទេស និងជារដ្ឋមន្ត្រីកិច្ចការនារីអូស្ត្រាលី ក្នុងជំនួបតាមទូរស័ព្ទកាលពីថ្ងៃទី០៩ ខែមិថុនា ម្សិលមិញថា កម្ពុជាមិនអនុញ្ញាតឱ្យមានវត្តមានមូលដ្ឋានយោធាបរទេសណាមួយនៅក្នុងទឹកដីរបស់កម្ពុជាឡើយ។ កម្ពុជារក្សានូវគោលការណ៍រដ្ឋធម្មនុញ្ញក្នុងការមិនអនុញ្ញាតឱ្យមានវត្តមានមូលដ្ឋានយោធាបរទេសណាមួយក្នុងទឹកដីរបស់កម្ពុជា។
ឯកឧត្តម ឧបនាយករដ្ឋមន្ដ្រី ប្រាក់ សុខុន បានបន្ថែមថា ជំហរកម្ពុជាដែលសម្ដេចតេជោនាយករដ្ឋមន្ត្រី បានបញ្ជាក់រួចហើយដល់បរទេសទាំងអស់អំពីការស្វាគមន៍គ្រប់ប្រទេសមកធ្វើការសមយុទ្ធយោធារួមគ្នា គឺបង្កើនកិច្ចសហប្រតិបត្តិការដែលផ្ដល់ផលប្រយោជន៍ទៅវិញទៅមកក្នុងមូលដ្ឋានកងទ័ពជើងទឹករាម៕
