មីយ៉ាន់ម៉ា ៖ ពលរដ្ឋមីយ៉ាន់ម៉ារាប់ពាន់នាក់បានប្រមូលផ្តុំគ្នានៅទូទាំងប្រទេសកាលពីថ្ងៃអាទិត្យដើម្បីប្រឆាំងនឹងការធ្វើរដ្ឋប្រហារកាលពីសប្តាហ៍មុន និងទាមទារឱ្យមានការដោះលែងមេដឹកនាំដែលជាប់ឆ្នោតលោកស្រី អ៊ុងសាន ស៊ូជី នៅក្នុងការតវ៉ាដ៏ធំបំផុតចាប់តាំងពីបដិវត្ត Saffron ឆ្នាំ២០០៧ ដែលបានជួយជំរុញឲ្យមានកំណែទម្រង់លទ្ធិប្រជាធិបតេយ្យ។ នេះបើយោងតាមប្រភពពីសារព័ត៌មាន Reuters។
នៅថ្ងៃទី២នៃការតវ៉ាហ្វូងមនុស្សបានប្រមូលផ្ដុំគ្នានៅក្នុងទីក្រុងធំ យ៉ាំងហ្គោនបានពាក់អាវពណ៌ក្រហមកាន់ទង់ក្រហមនិងប៉េងប៉ោងពណ៌ក្រហម ដែលតំណាងឲ្យគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី ស៊ូជី។
ក្រុមអ្នកតវ៉ាបានស្រែកថា យើងមិនចង់បានរបបផ្តាច់ការយោធាទេ! យើងចង់បានប្រជាធិបតេយ្យ! ។
ហ្វូងមនុស្សយ៉ាងច្រើនកុះករមកពីគ្រប់តំបន់នៃទីក្រុងយ៉ាំងហ្គោនបានប្រមូលផ្តុំគ្នានៅតាមទីប្រជុំជនតាមដងផ្លូវនានានៅពេលដែលពួកគេធ្វើដំណើរឆ្ពោះទៅវត្ត Sule នៅទីក្រុងនេះ ដែលក៏ជាចំណុចប្រមូលផ្ដុំគ្នាក្នុងអំឡុងបាតុកម្មដែលដឹកនាំដោយព្រះសង្ឃពុទ្ធសាសនាកាលពីឆ្នាំ២០០៧និងបាតុកម្មផ្សេងទៀតក្នុងឆ្នាំ១៩៨៨ផងដែរ។
ក្រុមប៉ូលិសប្រដាប់អាវុធដែលមានខែលការពារបានដាក់របាំង ប៉ុន្តែមិនបានព្យាយាមបញ្ឈប់បាតុកម្មទេ។ អ្នកហែក្បួនខ្លះបានប្រគល់ផ្កាទៅឲ្យប៉ូលិស។
ក្រុមអ្នកតវ៉ាបានបង្ហាញកាយវិការដោយប្រើម្រាមដៃបីដែលជានិមិត្តរូបនៃការតវ៉ាប្រឆាំងនឹងរដ្ឋប្រហារ។ អ្នកបើកបរបានចុចស៊ីផ្លេឡានម៉ូតូរបស់ពួកគេ ចំណែកអ្នកដើរបានកាន់រូបថតលោកស្រីស៊ូជី។
បុគ្គលិកអង្គការសហប្រជាជាតិបានប៉ាន់ស្មានថា មានមនុស្ស១,០០០នាក់បានចូលរួមការតវ៉ាក្នុងទីក្រុងណៃពិដោ ខណៈមាន៦ម៉ឺននាក់នៅទីក្រុង យ៉ាំងហ្គោន។ ការតវ៉ាត្រូវបានគេរាយការណ៍នៅក្នុងទីក្រុងទី២ Mandalay ព្រមទាំងទីប្រជុំជន និងភូមិជាច្រើននៅទូទាំងប្រទេស។
ក្រុមអ្នកតវ៉ាក្នុងទីក្រុងយ៉ាំងហ្គោនបានបំបែកគ្នានៅពេលយប់ ដោយនិយាយថា ពួកគេនឹងវិលត្រឡប់មកវិញប្រសិនបើការទាមទាររបស់ពួកគេមិនត្រូវបានឆ្លើយតបទេនោះ។ ការធ្វើបាតុកម្មនេះភាគច្រើនមានលក្ខណៈអហិង្សា មិនដូចការបង្ក្រាបបង្ហូរឈាមកាលពីឆ្នាំ១៩៩៨និង២០០៧ទេ៕
