នៅសប្តាហ៍ខាងមុខនេះ ប្រទេសកម្ពុជានឹងទទួលរងនូវឥទ្ធិពលពីទ្រនង់សម្ពាធខ្ពស់ ព្រមជាមួយនឹងខ្យល់មូសុងឦសាន ដែលធ្វើឲ្យតំបន់ជាច្រើនចុះត្រជាក់ រហូតដល់១៨អង្សាសេ។
បើតាមសេចក្តីជូនដំណឹងរបស់ក្រសួងធនធានទឹក និងឧតុនិយម ចាប់ពីថ្ងៃទី២-៣ ខែកុមភៈ កម្ពុជានឹងទទួលរងឥទ្ធិពលទ្រនុងសម្បាធខ្ពស់ក្នុងកម្រិតខ្សោយ ហើយពីថ្ងៃទី៤-៦ ខែកុម្ភៈ មានការកើតឡើងនូវឥទ្ធិពលពីរស្របគ្នា ពីទ្រនុងសម្ពាធខ្ពស់ចិន និងខ្យល់មូសុងឦសានក្នុងកម្រិតមធ្យម ខណៈពីថ្ងៃទី៧-៨ ខែកុម្ភៈ ឥទ្ធិពលពីសម្ពាធទាប ឥណ្ឌូនេស៊ី ក្នុងកម្រិតខ្សោយ។
ស្ថានភាពបែបនេះ នឹងធ្វើឱ្យបណ្តាខេត្តនៅតំបន់វាលទំនាបកណ្តាល អាចមានភ្លៀងធ្លាក់ជាអន្លើ ក្នុងកម្រិតពីខ្សោយទៅមធ្យម ដោយឡែកនៅថ្ងៃទី៥-៦ ខែកុម្ភៈ សីតុណ្ហភាពអាចមានពី ១៩ ទៅ២២អង្សាសេ គួបផ្សំនឹងខ្យល់ក្នុងល្បឿនមធ្យម។
សម្រាប់បណ្តាខេត្តជាប់ភ្នំដងរែក និងខ្ពង់រាបឦសាន អាចមានភ្លៀងធ្លាក់ជាអន្លើ ក្នុងកម្រិតពីខ្សោយទៅមធ្យម ដោយឡែកនៅថ្ងៃទី៥-៦ ខែកុម្ភៈ សីតុណ្ហភាពអាចមានពី ១៨-២១អង្សាសេ គួបផ្សំនឹងខ្យល់ក្នុងល្បឿនពីមធ្យមទៅខ្លាំង។
ដោយឡែកតំបន់មាត់សមុទ្រ សីតុណ្ហភាពអាចមានពី ២២-២៥អង្សាសេ អាចមានភ្លៀងធ្លាក់ក្នុងកម្រិតពីខ្សោយទៅមធ្យម៕
