ថៃ៖ នេះមិនមែនជាលើកទីមួយឡើយ ដែលហ្វូងស្វានៅខេត្ត Lopburi នៃប្រទេសថៃ ឈ្លោះដណ្ដើមចំណីគ្នាស៊ី ខណៈជំងឺកូវីដ-១៩រាតត្បាត ដែលធ្វើឲ្យភ្ញៀវទេសចរក្នុងនិងក្រៅស្រុក មិនអាចមកលេងកម្សាន្ត និងដាក់ចំណីឲ្យហ្វូងស្វាស៊ីដូចមុន។
តែលើកនេះ មានហ្វូងស្វាចំនួនពីរក្រុម ដែលមួយក្រុមមកពីប្រសាទបុរាណ និងមួយក្រុមទៀតមកពីរោងកុនដែលគេបោះបង់ចោល បានចេញមកឈ្លោះដណ្ដើមចំណីគ្នាស៊ីយ៉ាងប្រសាចពេញផ្លូវថ្នល់ ដែលបង្កឲ្យមានការកកស្ទះចរាចរណ៍ដល់អ្នកធ្វើដំណើរ រហូតដល់ត្រូវរង់ចាំជាង៤នាទីឯណោះ។
យ៉ាងណាមិញ ចំពោះបញ្ហានៃហ្វូងស្វាខ្វះខាតចំណីស៊ីនេះ ក៏បានជះឥទ្ធិពលអាក្រក់ទៅដល់ប្រជាជនដែលរស់នៅក្បែរៗនោះដែរ ដែលមានពេលខ្លះ ហ្វូងស្វាបានលួចយកចំណីអាហារពីផ្ទះរបស់ប្រជាជនយកទៅស៊ីផងដែរ។ ហើយឥឡូវនេះ ប្រទេសថៃកំពុងទប់ទល់នឹងកូវីដ-១៩រលកទីបី ដែលប៉ុន្មានថ្ងៃចុងក្រោយនេះ មានអ្នកវិជ្ជមានខ្ទង់ម៉ឺនករណីឯណោះ៕
