ខេត្តបាត់ដំបង៖ នៅព្រឹកថ្ងៃទី១០ ខែ កុម្ភ: ឆ្នាំ២០២១នេះ លោកឧត្តមេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង អនុប្រធានក្រុមការងារថ្នាក់ជាតិចុះជួយស្រុកមោងឫស្សី និងជាប្រធានក្រុមការងារថ្នាក់ជាតិចុះជួយឃុំរបស់មង្គល បានអញ្ជេីញចុះជួបសំណេះសំណាល និងនាំយកអំណោយអង្គការប្រតិបត្តិការកុមារកម្ពុជាចែកជូនដល់ប្រជាពលរដ្ឋចំនួន៤៣៩គ្រួសារដែលរងគ្រោះដោយទឹកជំនន់នាពេលកន្លងទៅក្នុងភូមិអន្លង់ត្រាច ឃុំរបស់មង្គល ស្រុកមោងឫស្សី ខេត្តបាត់ដំបង ។
នាឱកាសនេះលោកឧត្តមេនីយ៍ទោ សាត គឹមសាន បានពាំនាំនូវការផ្តាំផ្ញេីសាកសួរសុខទក្ខពីសំណាក់សម្តេចក្រឡាហោម ស ខេង ឧបនាយករដ្ឋមន្រ្តីរដ្ឋមន្រ្តីក្រសួងមហាផ្ទៃ ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្តមងួន រតនៈ អភិបាលនៃគណៈអភិបាលខេត្តបាត់ដំបង ព្រមទាំងឯកឧត្តម ឧត្តមសេនីយ៍ឯក សថេត អគ្គស្នងការរងនិងជាស្នងការនគរបាលរាជធានីភ្នំពេញដែលឯកឧត្តមធ្លាប់ទទួលភារកិច្ចជាប្រធានក្រុមការងារថ្នាក់ជាតិចុះជួយឃុំរបស់មង្គល ស្រុកមោងឫស្សី ខេត្តបាត់ដំបង នាពេលកន្លងទៅ។
ជាមួយគ្នានេះលោកឧត្តមេនីយ៍ទោ ស្នងការ ក៏បានអំពាវនាវដល់ប្រជាពលរដ្ឋចូលរួមអនុវត្តនូវគោលនយោបាយស្តីពីភូមិ ឃុំមានសុវត្ថិភាពដែលក្នុងនោះផ្តោតសំខាន់បញ្ហាគ្រឿងញៀនដែលក្រុមគ្រួសារនីមួយៗត្រូវអប់រំណែនាំសមាជិកគ្រួសាររបស់ខ្លួនឱ្យចៀសឆ្ងាយពីគ្រឿងញៀន និងសូមចូលរួមគោរពអនុវត្តឱ្យបានទាំងអស់គ្នានូវច្បាប់ចរាចរណ៍ផ្លូវគោកពិសេសបងប្អូនដែលប្រេីប្រាស់ផ្លូវ។
ដោយឡែកបញ្ហាគ្រោះអគ្គិភ័យដោយសាររដូវនះជារដូវប្រាំងហួតហែង ដូច្នេះសូមមេត្តាប្រុងប្រយ័ត្នខ្ពស់ចំពោះគ្រោះអគ្គិភ័យដែលអាចកេីតឡេីងតាមលំនៅដ្ឋានទាំងភ្លេីងជេីងក្រាន ភ្លេីងទៀនធូប ចរន្តអគ្គិសនីឬភ្លេីងព្រៃដែលអាចឆាបឆេះរាលដាលដល់លំនៅដ្ឋាន ហើយពិសេសជាងនេះអំពាវនាវដល់ប្រជាពលរដ្ឋទាំងអស់សូមចូលរួមបង្ការទប់ស្កាត់និងការពារខ្លួនពីបញ្ហាជម្ងឺឆ្លងCOVID-19 សូមប្រជាពលរដ្ឋអនុវត្តឱ្យបានតាមការណែនាំរបស់ក្រសួងសុខាភិបាល ការធ្វេីអនាម័យជាប់ជាប្រចាំ។
លោកឧត្តមសេនីយ៍ទោ ស្នងការបានបញ្ជាក់បន្ថែមថា កាលពីថ្ងៃទី៨ ខែ កុម្ភៈ ឆ្នាំ២០២១ ប្រជាពលរដ្ឋចំនួន១១ភូមិក្នុងឃុំរបស់មង្គល ស្រុកមោងឫស្សីចំនួន៦៦៩គ្រួសារបានទទួលអំណោយពីអង្គការខាងលេីនេះរួចហេីយ តែដោយសារស្ថានភាពផ្លូវលំបាកក្នុងការធ្វេីដំណេីរទេីបថ្ងៃនេះប្រជាពលដ្ឋនៅភូមិអន្លង់ត្រាច ដែលនៅឆ្ងាយជាងគេទទួលបាននៅពេលនេះ។
ហើយអំណោយដែលត្រូវផ្តល់ជូននាពេលនេះមួយគ្រួសារៗទទួលបាន៖-អង្ករចំនួន ២៥គីឡូក្រាម -មីចំនួន០១កេសតូច -ត្រីខកំប៉ុងចំនួន០១យួរ -ទឹកត្រីចំនួន០១យួរ -ទឹកសីអីវចំនួន០១យួរ -អំបិលអនាម័យចំនួន០១គីឡូក្រាម -ស្កសរចំនួន០១គីឡូក្រាម -ប្រេងឆាចំនួន០១ដប៕