គេហទំព័រអង្គការ NASA បានចុះផ្សាយថា អវកាសយានិកអាម៉េរិក លោក រ៉ូប៊ឺត បេនខេន និងលោក ឌូកក្លាស់ ហឺលី ដែលបានហោះទៅកាន់ស្ថានីយអវកាសអន្តរជាតិក្នុងយានថ្មី Crew Dragon របស់ក្រុមហ៊ុន SpaceX បានចុះមកផែនដីវិញតាមយាននៅឈូងសមុទ្រម៉ិកស៊ិកកាលពីថ្ងៃអាទិត្យម្សិលមិញ។
អ្នកគ្រប់គ្រងទីភ្នាក់ងារអវកាស NASA លោក ជីម ប្រ៊ីដិនស្ទីន បានប្រាប់អ្នកសារព័ត៌មានក្នុងសន្និសីទកាសែតថា នេះជាថ្ងៃដ៏អស្ចារ្យសម្រាប់ NASA និងជាថ្ងៃដ៏អស្ចារ្យសម្រាប់សហរដ្ឋអាម៉េរិក... ថ្ងៃនេះយើងពិតជាបានបង្កើតប្រវត្តិសាស្ត្រ។
សូមបញ្ជាក់ថា អវកាសយានិកអាម៉េរិកទាំងពីរ ដែលស្ថិតនៅទីអវកាសសរុប៦៤ថ្ងៃ បានចាកចេញពីស្ថានីយអវកាសអន្តរជាតិកាលពីថ្ងៃសៅរ៍សប្តាហ៍មុន ហើយបានវិលមកដល់ស្រុកកំណើតវិញនៅលើផ្ទៃទឹកសមុទ្រនៅឆ្នេរ ផេនសាកូឡា រដ្ឋផ្លរីដា នៅម៉ោង២៖៤៨នាទីរសៀលថ្ងៃអាទិត្យ (ម៉ោងក្នុងតំបន់) បន្ទាប់ពីការធ្វើដំណើរ២១ម៉ោងនៅលើយាន Crew Dragon ៕
