តំណាងក្រុមហ៊ុន Angkor Culture Investment and Development Group នាពេលថ្មីៗនេះ បានជួបជាមួយថ្នាក់ដឹកនាំខេត្តបាត់ដំបង ដើម្បីបង្ហាញពីបំណងវិនិយោគលើការបង្កើតមជ្ឈមណ្ឌលវប្បធម៌ និងទេសចរណ៍នៅក្នុងខេត្តមួយនេះ។
លោក សឿម ប៊ុនរិទ្ធិ អភិបាលរងខេត្តបាត់ដំបង បានអះអាងថា លោក Wang Yin Phing ជាតំណាងក្រុមហ៊ុនខាងលើ បានជួបពិភាក្សាជាមួយឯកឧត្តម ងួន រតនៈ អភិបាលខេត្តបាត់ដំបង ដើម្បីពិភាក្សាលើគម្រោងនេះ ខណៈក្រុមហ៊ុនចិនក៏មានការវិនិយោគលើមជ្ឈមណ្ឌលវប្បធម៌ និងទេសចរណ៍ក្នុងខេត្តសៀមរាបដែលត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តយល់ព្រមរួចហើយ។
លោកបន្តថា ក្នុងជំនួបនេះក្រៅពីការជជែកលើគម្រោងដែលក្រុមហ៊ុនចង់បង្កើតអភិបាលខេត្តបាត់ដំបងក៏បានស្នើសុំឲ្យក្រុមហ៊ុននេះ សម្លឹងមើលសក្តានុពលសម្រាប់បង្កើតឱកាសវិនិយោគលើវិស័យកសិកម្មពិសេសលើការកែច្នៃស្រូវអង្ករដ៏ល្បីល្បាញក្នុងខេត្តនេះ ផងដែរ៕
