តំណាងមកពីក្រុមហ៊ុន A2A Town Cambodia Co,Ltd ដែលជាក្រុមហ៊ុនជប៉ុនធ្វើការងារក្នុងគម្រោងអភិវឌ្ឍន៍តំបន់គីរីរម្យកម្ពុជា ហៅកាត់ថា “vKirirom” ដែលមានន័យថា គីរីរម្យសម្រាប់គ្រប់គ្នា(Kirirom for Everyone) ដែលរួមបញ្ចូលមានទាំងវិទ្យាស្ថាន មណ្ឌលកំសាន្ត ផ្ទះលំហែរ ជាលក្ខណៈអេកូទេសចរណ៌ ក្នុងទំហំផ្ទៃដី ១ម៉ឺនហិកតា ហ៊ុំព័ទ្ធដោយព្រែស្រល់ និងជើងភ្នំដ៏ស្រស់ត្រកាល នៅក្នុងតំបន់គីរីរម្យខេត្តកំពង់ស្ពឺ គឺដឹកនាំដោយលោក Bekku Kenzaburo អនុប្រធានក្រុមហ៊ុន។
ការបង្ហាញគម្រោងអភិវឌ្ឍន៍តំបន់គីរីរម្យនេះ ធ្វើឡើងក្នុងឱកាសជំនួបពិភាក្សាការងារមួយថ្នាក់ដឹកនាំ និងមន្រី្តជំនាញក្រោមឱវាទក្រសួង ដឹកនាំដោយឯកឧត្តម ចម ប្រសិទ្ធ ទេសរដ្ឋមន្រី្ត រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
ឯកឧត្តមទេសរដ្ឋមន្ត្រី ចម ប្រសិទ្ធ បានសម្តែងនូវមោទនៈភាព និងវាយតម្លៃខ្ពស់ចំពោះការវិនិយោគរបស់ក្រុមហ៊ុន A2A Town Cambodia Co,Ltd ដែលបានផ្តល់គុណតម្លៃមិនត្រឹមតែសម្រាប់វិស័យអេកូទេសចរណ៌ប៉ុណ្ណោះទេ តែបានផ្តល់ការគិតគូដ៏ខ្ពង់ខ្ពស់ទៅលើវិស័យអប់រំបច្ចេកវិទ្យាព័ត៌មាន ដោយផ្តល់អាហារូបករណ៌១០០%ដល់និស្សិតកម្ពុជាតាមរយៈការធ្វើតេស្តប្រលង រួមទាំងនិស្សិតជប៉ុន និងបរទេសមួយចំនួនទៀតផង៕