ភ្នំពេញ៖ ទិវាបុណ្យឯករាជ្យជាតិ ៩ វិច្ឆិកា ត្រូវបានប្រជារាស្រ្តខ្មែរចាត់ទុកជាពិធីបុណ្យជាតិដ៏សំខាន់បំផុត ដែលបានរំលឹកឲ្យឃើញពី ព្រះរាជបេសកកម្ម ដើម្បីជាតិមាតុភូមិ និងប្រជារាស្ត្រខ្មែររបស់ព្រះករុណា ព្រះបាទសម្តេចព្រះ នរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និង ព្រះបញ្ញាញាណយ៉ាងក្លៀវក្លាបំផុត ធ្វើការតស៊ូក្នុងក្របខ័ណ្ឌ នៃព្រះរាជបូជនីកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា តាមរយៈ Facebook ផ្លូវការរបស់សម្តេច នៅព្រឹកថ្ងៃទី៩ ខែវិច្ឆិកា ឆ្នាំ២០២១នេះ បានបង្ហោះសារអបអរសាទរ ខួបអនុស្សាវរីយ៏លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា។ សម្តេចតេជោនាយករដ្ឋមន្ត្រី បានសរសេរទាំងស្រុងយ៉ាងដូច្នេះថា «អបអរសាទរខួបអនុស្សាវរីយ៏លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា ។ ថ្ងៃនេះ គឺជាថ្ងៃដែលប្រទេសកម្ពុជា ត្រូវប្រារព្ធខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា (៩ វិច្ឆិកា ១៩៥៣-៩ វិច្ឆិកា ២០២១) ដែលកម្ពុជាទទួលបានឯករាជ្យ ពីអាណានិគមនិយមបារាំង ស្របជាមួយនឹងខួប៦៨ឆ្នាំ នៃការបង្កើតកងយោធពលខេមរភូមិន្ទផងដែរ។
ទិវាបុណ្យឯករាជ្យជាតិ ៩ វិច្ឆិកា បានរំលឹកឲ្យឃើញពី ព្រះរាជបេសកកម្មដើម្បីជាតិមាតុភូមិ និងប្រជារាស្ត្រខ្មែររបស់ព្រះករុណាព្រះបាទសម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត ធ្វើការតស៊ូក្នុងក្របខ័ណ្ឌ នៃព្រះរាជបូជនីកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា»។
រីឯព្រឹត្តិការណ៍ខួបអនុស្សាវរីយ៏លើកទី៦៨ នៃទិវាបុណ្យឯករាជ្យជាតិ ៩ វិច្ឆិកាឯណេះវិញ បានប្រាពឡើងយ៉ាងមហោឡារឹក ក្រោមព្រះរាជវត្តមានដ៏ឧត្តុងឧត្តមនៃព្រះករុណា ព្រះបាទសម្តេច ព្រះបរនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងវត្តមានដ៏ថ្លៃថ្លារបស់ប្រមុខដឹកនាំកំពូលៗ មន្រ្តីរាជការ ប្រជាពលរដ្ឋ ក្មួយៗសិស្សានុសិស្ស ក្នុងបរិយាកាសរីករាយក្រៃលែងបំផុត។
មហាជនដែលបានចូលរួមប្រារពពិធី បានសម្តែងនូវក្តីរីករាយ ដែលបានចូលរួមអបអរសាទរ ខួបអនុស្សាវរីយ៏លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា និងបានសម្តែងនូវក្តីនឹករលឹក អាឡោះអាល័យជាពន់ពេក ចំពោះអង្គសម្តេចឪ សម្តេចតា សម្តេចតាទួត ព្រះបរមរតនកោដ្ឋ ដែលព្រះអង្គបានឃ្លាតព្រះកាយទៅ ដោយបន្សល់ទុកនូវស្នាមព្រះហស្ថ និង ព្រះរាជកិច្ចដឹកនាំដ៏ច្រើន ដែលប្រជារាស្រ្តខ្មែរគ្រប់ជំនាន់បានចងចាំជានិច្ច ជាពិសេសបូជនីយកិច្ចទាមទារឯករាជ្យជាតិ ពីអាណានិគមបារាំង ក្នុងឆ្នាំ១៩៥៣។
