ផ្ទាំងទឹកកកភាគខាងកើត ទ្វីបអាហ្វ្រិក នឹងរលាយសាបសូន្យក្នុងរយៈពេលពីរទសវត្សរ៍ខាងមុខ ដែលធ្វើឲ្យមានគ្រោះរាំងស្ងួត ទឹកជំនន់ ឬកំដៅខ្លាំង។ នេះបើតាមការបញ្ជាក់ដោយទីភ្នាក់ងារអាកាសធាតុរបស់អង្គការសហប្រជាជាតិ និងចុះផ្សាយដោយសារព័ត៌មានCNA កាលពីថ្ងៃទី១៩ ខែតុលា ឆ្នាំ២០២១។
ស្ថានភាពអាកាសធាតុនៅទ្វីបអាហ្វ្រិក ដោយអង្គការឧតុនិយមពិភពលោក WMO សហការជាមួយទីភ្នាក់ងារសហភាពអាហ្វ្រិកបានបង្ហាញ ពីរូបភាពអាក្រក់នៃសមត្ថភាពរបស់ ទ្វីបនេះ ក្នុងការសម្របខ្លួនទៅនឹងគ្រោះមហន្តរាយអាកាសធាតុ ដែលកាន់តែខ្លាំងឡើងៗ ។
អត្រាបច្ចុប្បន្ននៃវាលទឹកកកត្រូពិចទាំងបី របស់ទ្វីបអាហ្វ្រិក គឺ Kilimanjaro របស់ តង់ហ្សានី ភ្នំកេនយ៉ា និងរីនហ្សូរីស របស់អ៊ូហ្គង់ដា នឹងត្រូវបាត់បង់នៅទសវត្សឆ្នាំ ២០៤០ ។
លើសពីនេះទៀត នៅឆ្នាំ២០៣០ គេប៉ាន់ប្រមាណថា ប្រជាជនក្រីក្រ រហូតដល់ទៅ១១៨លាននាក់ នឹងត្រូវប្រឈមមុខនឹងគ្រោះរាំងស្ងួត ទឹកជំនន់ និងកំដៅខ្លាំង ប្រសិនបើមិនមានវិធានការឆ្លើយតប គ្រប់គ្រាន់ទេ។
គួរបញ្ជាក់ថា ទ្វីបអាហ្វ្រិក ដែលមានចំនួនតិចជាង ៤ ភាគរយនៃការបញ្ចេញឧស្ម័នផ្ទះកញ្ចក់ ត្រូវបានគេ រំពឹងថា នឹងរងផលប៉ះពាល់យ៉ាងធ្ងន់ធ្ងរពីការប្រែប្រួលអាកាសធាតុ៕
`