រាជធានីភ្នំពេញ --- យោងតាមការចុះផ្សាយរបស់ក្រុមប្រឹក្សាអភិវឌ្ឍនកម្ពុជា កាលពីល្ងាចថ្ងសទី២៦ ខែកក្កដា បានឲ្យដឹងថា ខ្លួនបានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនចំនួន៤ ធ្វើការវិនិយោគបើករោងចក្រនៅកម្ពុជា ដែលក្នុងនោះមានទាំងរោងចក្រផលិតថង់ក្រណាត់ ថង់ក្រដាស់ ក៏ដូចជាកសិដ្ឋានចិញ្ចឹមគោយកទឹកដោះផងដែរ។
តាមប្រកាសរបស់ក្រុមប្រឹក្សាអភិវឌ្ឍនកម្ពុជា រោងចក្រទាំង៤នោះរួមមាន ៖ ១- “KPNL CO., LTD.” គម្រោងបង្កើតរោងចក្រផលិតថង់ក្រណាត់គ្រប់ប្រភេទ ដែលមានទីតាំងវិនិយោគស្ថិតនៅដីឡូតិ៍លេខ១៤២ ភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ២៤៨កន្លែង។
២- “XINYAO UNION (CAMBODIA) GARMENT CO., LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ២ ភូមិត្រកៀត ឃុំត្រពាំងសាប ស្រុកបាទី ខេត្តតាកែវ មានទុនវិនិយោគប្រមាណ ៣,៥លានដុល្លារអាមេរិក និងអាចបង្កើតការងារបានចំនួន ២.០២៣កន្លែង។
៣- “XING BANG PAPER INDUSTRIAL (CAMBODIA) CO., LTD.” គម្រោងបង្កើតរោងចក្រកែច្នៃក្រដាស ផលិតកេសកាតុង និងថង់ក្រដាស ដែលមានទីតាំងវិនិយោគស្ថិតនៅភូមិក្រាំងទ្រា ឃុំព្រៃនិព្វាន្ត គងពិសី ខេត្តកំពង់ស្ពឹ មានទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន ១៨២ កន្លែង។
និង ៤-“KHMER FRESH MILK CO.,LTD.”គម្រោងបង្កើតកសិដ្ឋានចិញ្ចឹមគោយកទឹកដោះ និងរោងចក្រកែច្នៃដែលមានទីតាំងវិនិយោគស្ថិតនៅភូមិឧកាសាំង ឃុំកណ្តឹង ស្រុកបាទី ខេត្តតាកែវ មានទុនវិនិយោគ ១០លានដុល្លារអាមេរិក និងអាចបង្កើតការងារបានចំនួន ៣៧កន្លែង៕
