ខេត្តកំពង់ឆ្នាំង៖ គិតត្រឹមរសៀលថ្ងៃទី៣០ ខែវិច្ឆិកា ម្សិលមិញ ចំនួនអ្នករងគ្រោះដោយសារពុលស្រាស ក្នុងស្រុកទឹកផុស បានកើនឡើងដល់ ១៣១នាក់ ហើយ ក្នុងនោះ ៧នាក់ បានស្លាប់។ នេះបើតាមការបញ្ជាក់ពីលោកជំទាវ ឱ វណ្ឌឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។
លោកជំទាវ បានឲ្យដឹងថា អ្នកកំពុងសម្រាកព្យាបាលនៅមន្ទីរពេទ្យ ខេត្តកំពង់ឆ្នាំង ជាបុរស មានចំនួន ៣១នាក់ និងសម្រាកព្យាបាលនៅមន្ទីរពេទ្យកាល់ម៉ែត ចំនួន ៣នាក់។ ក្នុងនោះ មាន អ្នកស្លាប់ចំនួន ៧នាក់ គឺស្លាប់ នៅមនី្ទរពេទ្យខេត្ត ២នាក់ ស្លាប់ពេលបញ្ជូន មកភ្នំពេញ ២នាក់ ស្លាប់នៅផ្ទះ ២នាក់ និងស្លាប់នៅមន្ទីរពេទ្យកាល់ម៉ែត ម្នាក់។ រីឯអ្នកជាសះស្បើយ មានចំនួន៩០នាក់។
គួររំលឹកថា ករណីសង្ស័យពុលស្រាសនេះ បានកើតឡើងកាលពីថ្ងៃទី២៨ ខែវិច្ឆិកា ឆ្នាំ២០២០ នៅក្នុងភូមិជីប្រ៉ង ឃុំជៀប ស្រុកទឹកផុស ខេត្តកំពង់ឆ្នាំង នាពិធីបុណ្យសពក្នុងភូមិ ជួបជុំពិសារស្រាស៕