មន្ត្រីឥណ្ឌា បាននិយាយថា សត្វខ្លាមួយក្បាល ដែលបានសម្លាប់មនុស្សអស់ចំនួន៣នាក់ នឹងត្រូវដាក់ទោសដោយដាក់ក្នុងទ្រុងអស់មួយជីវិត។ នេះបើតាមការចេញផ្សាយដោយសារព័ត៌មាន AFP កាលពីថ្ងៃទី០៨ ខែមិថុនា ម្សិលមិញ។
ប្រធានភ្នាក់ងារការពារសត្វព្រៃ Madhya Pradesh, S.K. លោក S.K. Mandal បានលើកឡើងថា សត្វខ្លាមួយក្បាលនេះ ត្រូវបានជួយសង្គ្រោះពីអន្ទាក់កាលពីខែធ្នូ ឆ្នាំ២០១៨ និងទទួលយកមកមើលថែនៅក្នុងឧទ្យានជាតិ។ វាត្រូវបានដាក់ឈ្មោះថា "វ៉ាសានដូ" ឬ "ពនេចរ"។ ក្រោយមកដោយសារអាការៈវង្វេងស្មារតី វាក៏បានចេញវាយប្រហារសត្វគោជាច្រើនក្បាល ព្រមទាំងសម្លាប់មនុស្សចំនួន៣នាក់ ផងដែរ។
ទីបំផុតសត្វខ្លា មួយក្បាលនេះ ត្រូវបានចាប់បញ្ជូនទៅកាន់សួនសត្វ Bhopal ក្នុងរដ្ឋធានី Madhya Pradesh ប្រទេសឥណ្ឌា។ លោក S.K. Mandal បន្តថា ជម្រើសតែមួយគត់ដែលនៅសល់គឺត្រូវដាក់វាឱ្យជាប់ ដើម្បីធានាសុវត្ថិភាព។
លោកបញ្ជាក់ថា ការទន្ទ្រានចូលរបស់មនុស្សទៅលើជម្រកសត្វខ្លា បានកើនឡើងទ្វេរដងនៅក្នុងទសវត្សថ្មីៗនេះ ដែលជាហេតុនាំឱ្យមានជម្លោះស្លាប់ជាមួយសត្វ។ មនុស្សប្រមាណ២២៥នាក់ ត្រូវបានសម្លាប់ក្នុងការវាយប្រហារជាមួយខ្លា ខណៈបច្ចុប្បន្ននេះ សត្វខ្លាជាង ២០០ក្បាល ត្រូវបានសម្លាប់ដោយការបរបាញ់ និងឆក់៕
កែសម្រូលដោយ៖ ZaRet