ខេត្តបាត់ដំបង៖ ប្រជាពលករប្រុស ស្រីចំនួនជិត ២០នាក់ដែលលបលួចបម្រុងឆ្លងដែនចូលទៅក្នុងទឹកដីប្រទេសថៃត្រូវសមត្ថកិច្ចឃាត់ខ្លួន និងបញ្ជូនទៅធ្វើចត្តាឡីស័ក។
នគរបាលការិយាល័យជំនាញរបស់ស្នងការដ្ឋាននគរបាលខេត្តបាត់ដំបងបានប្រាប់ឲ្យដឹងថា÷ កម្លាំងចម្រុះការពារសន្តិសុខតាមខ្សែបន្ទាត់ព្រំដែនកម្ពុជា-ថៃ ខណ:ចុះត្រួតពិនិត្យពលរដ្ឋឆ្លងដែន និងមេខ្យល់នាំពលករ ចេញ ចូលខុសច្បាប់នៅថ្ងៃទី ២៣ ខែមិថុនា ឆ្នាំ ២០២១នេះបានឃាត់ខ្លួនពលករប្រុស ស្រីសរុបចំនួន ១៦នាក់ខណះដែលពួកគេកំពុងព្យាយាមលបលួចឆ្លងដែនចូលក្នុងទឹកដីប្រទេសថៃដោយខុសច្បាប់ទាំងប្រថុយប្រថានតាមការអូសទាញរបស់មេខ្យល់។
ពលករទាំងអស់ខាងលើ ក្នុងនោះ ២នាក់ត្រូវបានសមត្ថកិច្ចឃាត់ខ្លួននៅត្រង់ចំណុចភូមិសាស្ត្រភូមិអូរ ឃុំសន្តិភាព និងពលករខ្មែរសរុបចំនួន ១៤នាក់ផ្សេងទៀតត្រូវសមត្ថកិច្ចថៃឃាត់ខ្លួនបានចំណុចឈមគ្នាក្នុងភូមិសាស្ត្រភូមិគីឡូ ៩ ឃុំជ្រៃសីមា និងត្រង់ចំណុចភូមិសាស្ត្រភូមិពោធិ៍ជ្រៃ ឃុំសិរីមានជ័យ ស្រុកសំពៅលូន រូចប្រគល់ឲ្យកម្លាំងការពារតំបន់ព្រំដែនកម្ពុជាដើម្បីអនុវត្តច្បាប់។
ជាមួយការឃាត់ខ្លួននេះកម្លាំងសមត្ថកិច្ចបានសាកសួរ រួចណែនាំអប់រំ និងចុងក្រោយប្រគល់ពួកគាត់ទៅឲ្យក្រុមគ្រូពេទ្យដើម្បីនាំយកទៅកាន់មណ្ឌលចត្តាឡីស័កអនុវិទ្យាល័យកូនភ្នំ ៣២តាមគោលការណ៍របស់ក្រសួងសុខាភិបាល ពិសេសរាជរដ្ឋាភិបាលដែលបានកំណត់ផងដែរ៕
