អ្នកគាំទ្រកងទ័ពរាប់ពាន់នាក់បានចេញមកប្រមូលផ្តុំគ្នានៅឯឧទ្យានប្រជាជន នៅថ្ងៃអង្គារម្សិលមិញ ដើម្បីបង្ហាញការគាំទ្ររបស់ពួកគេ ចំពោះការប្រកាសដាក់ប្រទេសក្នុងគ្រាអាសន្នកាលពីថ្ងៃទី០១ ខែកុម្ភៈកន្លងទៅនេះ។
ជាមួយគ្នានេះ បាតុករបាននិយាយថា ពួកគេនឹងច្រានចោលការជ្រៀតជ្រែកពីបរទេស ហើយគាំទ្ររដ្ឋាភិបាលដែលបង្កើតឡើងដោយកងទ័ព ។ ប្រជាជននៅក្នុងតំបន់ Hmawbi, Taikkyi, Hlegu, Mingalardon និង Insein បានជិះរថយន្តរាប់រយគ្រឿងមកចូលរួមក្នុងព្រឹត្តិការណ៍នេះ ដែលជាហេតុបង្កឲ្យមានការកកស្ទះចរាចរណ៍នៅខាងមុខឧទ្យានប្រជាជន។
ដោយឡែកនៅក្នុងសេចក្តីថ្លែងការណ៍មួយ កាលពីថ្ងៃអង្គារម្សិលមិញ សមាគមពុទ្ធសាសនាដ៏មានឥទ្ធិពលរបស់ប្រទេសមីយ៉ាន់ម៉ា ក៏បានប្តេជ្ញាគាំទ្ររដ្ឋាភិបាលដែលបង្កើតឡើងដោយយោធាផងដែរ។
សេចក្តីថ្លែងការណ៍នោះបញ្ជាក់ថា ពួកគេនឹងឈរជាមួយកងទ័ព ដើម្បីការពារជាតិសាសន៍ សាសនា និងការអប់រំ ហើយទទួលយករដ្ឋាភិបាលដែលទើបបង្កើតថ្មី៕
