អគ្គិភ័យមួយបានឆាបឆេះពេញតួអាគារលំនៅដ្ឋានដ៏ខ្ពស់មួយនៅទីក្រុងកំពង់ផែ អ៊ុលសាន របស់កូរ៉េខាងត្បូង កាលពីយប់ថ្ងៃព្រហស្បតិ៍នេះ ដែលបណ្តាលឱ្យមានមនុស្សប្រមាណ៨៨នាក់ទទួលរងរបួស នេះបើតាមសារព័ត៌មាន AP នៅថ្ងៃ០៩ ខែតុលា ឆ្នាំ២០២០ ។
រូបពីកន្លែងកើតហេតុបង្ហាញដុំភ្លើងដ៏ធំរត់ឡើងលើតួអាគារកំពស់៣៣ជាន់យ៉ាងលឿនរហូតដល់ដំបូល នៅពេលបុគ្គលិកពន្លត់អគ្គិភ័យព្យាយាមពន្លត់ពីក្រោយទៅ ។ មកទល់ពេលនេះ មិនទាន់មានសេចក្តីរាយការណ៍ភ្លាមៗនៅឡើយថាតើមានអ្នកស្លាប់ ឬ របួសធ្ងន់ដែរឬទេ? តែក្រសួងមហាផ្ទៃ និងសុវត្ថិភាពកូរ៉េខាងត្បូងបញ្ជាក់ថា មនុស្ស៨៨នាក់ត្រូវបាននាំទៅព្យាបាលដោយសាររងរបួសតិចតួច ដូចជារលាត់ស្បែក និងឈ្លួកផ្សែង ។
មនុស្សរាប់រយនាក់ត្រូវបានជម្លៀសនៅពេលអគ្គិភ័យចាប់ផ្តើមឡើង ហើយមនុស្ស៧៧នាក់ត្រូវបានសង្គ្រោះចេញពីដំបូលអាគារ និង កន្លែងផ្សេងទៀតក្នុងអាគារ ។ ជាមួយគ្នានេះ មន្ត្រីកូរ៉េខាងត្បូងកំពុងស៊ើបអង្កេតរកមូលហេតុនៃការឆេះនេះ ដែលបានចាប់ផ្តើមចេញពីយ៉នៅជាន់ក្រោមមួយ និងឆាបឆេះរាលឡើងលើនៅខាងក្រៅអាគារយ៉ាងលឿនដោយសារខ្យល់ខ្លាំង ។ អគ្គិភ័យនេះទើបអាចពន្លត់បានទាំងស្រុងនៅម៉ោង៩ព្រឹកថ្ងៃសុក្រនេះ (ម៉ោងក្នុងតំបន់) ៕