ក្រសួងទេសចរណ៍ គ្រោងរៀបចំពិធីបុណ្យសមុទ្រនៅខេត្តព្រះសីហនុ នៅចុងឆ្នាំ ២០២០ នេះ ប្រសិនបើស្ថានភាពជំងឺកូវីដ ១៩ បានធូរស្រាល។ នេះបើតាមការលើកឡើងដោយឯកឧត្តមថោង ខុន រដ្ឋមន្ត្រីក្រសួងទេសចរណ៍ កាលពីពេលថ្មីៗនេះ ក្នុងឱកាសចុះពិនិត្យទីតាំងមួយចំនួន ដើម្បីដាក់ផែនការត្រៀមរៀបចំពិធីបុណ្យសមុទ្រ។
ឯកឧត្តម បានលើកឡើងថា ក្នុងករណីដែលសភាពការកូវីដបានធូរស្រាល ហើយរដ្ឋាភិបាលអនុញ្ញាត ក្រសួងទេសចរណ៍គ្រោងកំណត់យកការរៀបចំពិធីបុណ្យសមុទ្រលើកទី ៩ នៅខេត្តព្រះសីហនុនាចុងឆ្នាំនេះ ជាយុទ្ធនាការពង្រឹងគុណភាពសេវាកម្មទេសចរណ៍ និងធានាបានសុវត្ថិភាពទេសចរណ៍ដើម្បីផ្សព្វផ្សាយទៅកាន់ទីផ្សារទេសចរណ៍អន្តរជាតិថា កម្ពុជានៅតែជាគោលដៅទេសចរណ៍មានសុវត្ថិភាព និងមានគុណភាពសេវាកម្មទេសចរណ៍ល្អប្រសើរជាងមុន។
មន្ត្រីនាំពាក្យសាលាខេត្តព្រះសីហនុលោក ឃាង ភារម្យ ក៏បានឲ្យដឹងដែរថា កម្មវិធីបុណ្យសមុទ្រឆ្នាំនេះ គ្រោងនឹងរៀបចំពិព័រណ៍នៅរង្វង់មូលព្រះថោងនាងនាគស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខណៈតំបន់ឆ្នេរសមុទ្រសាធារណៈប្រវែងជាង ៩ គីឡូម៉ែត្រនឹងទុកជាតំបន់ទំនេរ ដើម្បីឱ្យពលរដ្ឋធ្វើដំណើរចេញពីកន្លែងរៀបចំពិធីបុណ្យសមុទ្រមកលេងកម្សាន្តលើឆ្នេរទាំងអស់៕
