រដ្ឋបាលសាលារាជធានីភ្នំពេញ បានអំពាវនាវជាថ្មីដល់ប្រជាពលរដ្ ឋដែលមិនទាន់បានបង់ថ្លៃសេវាប្រមូលសំរាម និងសំណល់រឹង សូមអញ្ជើញរួសរាន់ ដើម្បីចៀសវាងពីការពិន័យផ្សេងៗ។
រដ្ឋបាលសាលារាជធានីភ្នំពេញ បានប្រកាសថា ការអំពាវនេះ គឺដើម្បីចៀសវាងនូវការបញ្ចេញឈ្មោះលើបណ្តាញសង្គម នាំឲ្យបងប្អូនខ្មាស់គេ ដូច្នេះសូមបងប្អូនយើងរូតរះអញ្ជើញទៅបង់ថ្លៃ សេវាប្រមូលសំរាមឲ្យបានរួសរាន់ តាមសេចក្តីជូនដំណឹងរបស់រដ្ឋបាលរាជធានីភ្នំពេញ។
រដ្ឋបាលរាជធានីភ្នំពេញ ក៏បានកត់សម្គាល់ឃើញថា រហូតមកដល់ពេលនេះ ប្រជាពលរដ្ឋភាគច្រើនបង់ថ្លៃសេវាប្រមូលសំរាមរួចហើយ ប៉ុន្ដែនៅមានមួយចំនួន មិនទាន់បានបំពេញកាតព្វកិច្ចបង់ថ្លៃសេវាប្រមូលសំរាម និងសំណល់រឹងនេះនៅឡើយ។
សូមបញ្ចាក់ថា រាជរដ្ឋាភិបាលសម្រេចបង្វែរថ្លៃសេវាប្រមូលសំរាម និងសំណល់រឹង នៅរាជធានីភ្នំពេញ ពីក្រុមហ៊ុនស៊ិនទ្រី មកជូនរដ្ឋាករស្វយ័តគ្រប់គ្រងសំរាម និងសំណង់រឹងរាជធានីភ្នំពេញវិញ ដើម្បីជំរុញនូវប្រសិទ្ធភាពនៃការប្រមូលសំរាម៕