ឯកឧត្តម ឃួង ស្រេង អភិបាលរាជធានីភ្នំពេញ ក្នុងសន្និសីទកាសែត កាលពីថ្ងៃទី១៦ ខែមិថុនា ម្សិលមិញថា បានប្រកាសពីការបន្តយកចិត្តទុកដាក់ អនុវត្តរាល់វិធានការនានា របស់រាជរដ្ឋាភិបាល ក្នុងការប្រយុទ្ធប្រឆាំងនឹងការរីករាលដាលនៃជំងឺកូវីដ១៩ ជាពិសេសបន្តជំរុញអាជ្ញាធរមូលដ្ឋាន មិនឲ្យមានការជួបជុំរៀបចំកម្មវិធីសាសនា កម្មវិធីប្រគុំតន្ត្រី នៅតាមទីធ្លាសាធារណៈ បិទអាជីវកម្មខារ៉ាអូខេ ( KTV ) ក្លឹបកំសាន្ត រោងភាពយន្ត បៀរហ្គាឌិន កាស៊ីណូណាហ្គាវើល និងកន្លែងសប្បាយភាពក្នុងវិស័យទេសចរណ៍។
ឯកឧត្តមបានបន្ថែមថា រដ្ឋបាលរាជធានីភ្នំពេញ ក៏បន្តចុះអប់រំផ្សព្វផ្សាយនូវចំណេះដឹងសុខភាព និងវិធានការនានា អំពីការអនុវត្តអនាម័យដៃស្អាត ការពាក់ម៉ាសឲ្យបានត្រឹមត្រូវ ការអនុវត្តវិធានការគម្លាតសុវត្ថិភាពសង្គម និងការផ្អាកសកម្មភាពជួបជុំប្រមូលផ្តុំ ជាដើម៕
