ឯកឧត្តម ឃួង ស្រេង អភិបាលរាជធានីភ្នំពេញ បានថ្លែងក្នុងសន្និសិទកាសែត នាព្រឹកថ្ងៃទី១៦ ខែមិថុនា នេះ ថា ក្រុងភ្នំពេញបច្ចុប្បន្ន មានប្រជាជនរស់នៅ និងស្នាក់នៅបម្រើការងារ ប្រមាណជាង ៣លាននាក់ និងមានស្ថិតិយានយន្តគ្រប់ប្រភេទ ដែលបានចុះបញ្ជីនៅរាជធានីភ្នំពេញ គឺរថយន្ត មាន ៥៣ម៉ឺនគ្រឿង ទោចក្រយានយន្ត និងត្រីចក្រយានយន្ត មាន ១,៦ លានគ្រឿង រួមនិងយានយន្តឆ្លងកាត់ សរុបមានចំនួនប្រមាណ ៣លានគ្រឿង។
ឯកឧត្តម ឃួង ស្រេង បន្តថា កម្រិតជីវភាពរស់នៅរបស់ប្រជាពលរដ្ឋ គឺអត្រាភាពក្រីក្រ បានធ្លាក់ចុះមកត្រឹមប្រមាណ ៩% និងការកើនឡើងនូវទំហំផលិតផលក្នុងស្រុកសរុប សម្រាប់មនុស្សម្នាក់ៗ នៅរាជធានីភ្នំពេញ រហូតដល់ ៣.៩៨៦ ដុល្លារ ក្នុងឆ្នាំ២០១៩៕
