សារព័ត៌មានអង់គ្លេស The Independent បានឲ្យដឹងនៅថ្ងៃទី០២ ខែមិថុនា ឆ្នាំ២០២០នេះថា បុរសស្បែកខ្មៅជនជាតិអាមេរិក ម្នាក់ ត្រូវបានប៉ូលីសបាញ់ស្លាប់ ក្នុងអំឡុងពេលប៉ះទង្គិចគ្នាជាមួយក្រុមបាតុករ ក្នុងទីក្រុង Louisville រដ្ឋKentucky សហរដ្ឋអាមេរិក កាលពីថ្ងៃម្សិលមិញ។
បើតាមសម្តីប៉ូលីស បានរៀបរាប់ថា បុរសខាងលើមានឈ្មោះ David McAtee អាយុ៥៣ឆ្នាំ ជាអ្នកបើកហាងលក់សាច់អាំង។ ជនរងគ្រោះមិនមែនជាសកម្មជនក្នុងហ្វូងបាតុករឡើយ ប៉ុន្តែក្នុងអំឡុងពេលបាតុករបាញ់កាំភ្លើងមកកាន់ក្រុមប៉ូលីស ទើបប៉ូលីសបាញ់តបតវិញក៏ត្រូវចំជនរងគ្រោះ បណ្តាលឲ្យស្លាប់។
លោក Greg Fischer ដែលជាអភិបាលក្រុង Louisville បានសម្រេចដកតួនាទីមេបញ្ជាការប៉ូលិសប្រចាំទីក្រុងនេះ រីឯប៉ូលិសចំនួន២នាក់ទៀត ក៏ត្រូវបានព្យួរការងារជាបណ្តោះអាសន្ន។ លើសពីនោះអាជ្ញាធរនឹងបើកការស៊ើបអង្កេតពាក់ព័ន្ឋករណីនេះ ផងដែរ៕