( ប៉ៃលិន)៖ មានសេចក្ដីរាយការណ៍ចេញពីពន្ធនាគារខេត្តប៉ៃលិន បានឱ្យដឹងថា លោក តូច សុភក្ដី ព្រះរាជអាជ្ញាអមសាលាដំបូងខេត្ត បានចេញបទបញ្ជាឱ្យមន្ត្រីនគរបាលស្នងការខេត្ត ចុះទៅត្រួតពិនិត្យភ្លាមៗ នៅក្នុងពន្ធនាគារកាលពីវេលាម៉ោង១២ និង៣០នាទីថ្ងៃត្រង់ថ្ងៃទី២៦ សីហា ២០១៩ ដើម្បីធ្វើការសាកសួរអំពីអ្នកទោសនៅក្នុងពន្ធនាគារមួយនេះ លើករណីប្រើអំពើហិង្សា (រវាងអ្នកទោសស្រី និងអ្នកទោសស្រី) បណ្ដាលឱ្យរងរបួសមនុស្ស៣នាក់ និងផ្អើលពេញពន្ធនាគារ។
ប្រភពព័ត៌មានបានឱ្យដឹងថា បន្ទាប់ពីស្ត្រីម្នាក់ ឈ្មោះ រឿន ចរិយា ជាមន្ត្រីសុរិយោដីផ្អែកសំណង់ បានឆបោកប្រាក់ គេអស់រាប់សែនដុល្លារ ត្រូវម្ចាស់គេប្តឹងនគរបាលឱ្យចាប់ឃាត់ខ្លួន យកទៅដាក់នៅពន្ធនាគារខេត្តកាលពីដើមខែមុខ ស្រាប់តែស្ត្រីរូបនេះ ក្អេងក្អាងពេញក្នុងបន្ទប់ពន្ធនាគារ មិនខ្លាចញញើតនរណា ម្នាក់ឡើយ ហើយក៏និយាយឌឺដងដាក់អ្នកទោសនៅក្នុងបន្ទប់ជាមួយគ្នា លុះប្រកែកគ្នាចុះឡើងៗ បង្កទៅជាហិង្សា ប្រវាយប្រតប់គ្នា បណ្ដាលឱ្យស្ត្រីម្នាក់សន្លប់នៅនឹងកន្លែង ត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្តភ្លាមៗ។
ប្រភពបន្តទៀតថា កាលពីវេលាម៉ោង១១ និង៤០នាទីព្រឹក ថ្ងៃខែឆ្នាំដដែល ជនជាប់ឃុំ ឈ្មោះ រឿន ចរិយា អាយុ៣២ឆ្នាំ ជាមន្ត្រីសុរិយោដី ជាប់ពន្ធនាគារ ករណីឆបោក ខណ:ឈ្លោះប្រកែកជាមួយនឹងស្ត្រីម្នាក់ឈ្មោះ មាន ស្រី ភេទស្រី ដោយជេរគ្នាចុះឡើងៗ ក៏បង្កទៅជាការវាយតប់គ្នា ផ្អើលក្នុងពន្ធនាគារ គឺពួកគេប្រើដៃនឹងដៃ បោចសក់គ្នា ហើយគ្មាននរណាម្នាក់ ហ៊ានចូលទៅជួយនោះឡើយ ស្រាប់តែភ្លាមនោះ មានស្ត្រីម្នាក់ទៀត ឈ្មោះ សឹង លីផា ឃើញអ្នកទាំងពីរវាយគ្នាជាប់រមូរ ក៏ស្ទុះចូលទៅជួយចាប់ឃាត់បេះចេញ ព្រោះឃើញឈ្មោះ មាន ស្រី ត្រូវគេវាយសន្លប់នៅនឹងកន្លែង។
ក្រោយពេលបង្កហិង្សាក្នុងពន្ធនាគារ ឈ្មោះ រឿន ចរិយា រងរបួសដៃឆ្វេងស្រាល រីឯឈ្មោះ សឹង លីផា រងរបួសដៃស្ដាំស្រាលដែរ កំពុងត្រូវបានគេយកទៅព្យាបាលនៅមន្ទីរពេទ្យបង្អែកខេត្ត។
ពាក់ព័ន្ធទៅនឹងបញ្ហានេះ លោក លីម វាសនា ប្រធានពន្ធនាគារខេត្តប៉ៃលិន បានឱ្យដឹងតាមទូរសព្ទថា តាំងពីយូរមកហើយ នៅក្នុងពន្ធនាគារខេត្ត ក្នុងភូមិទឹកចេញឃុំស្ទឹងកាច់ ស្រុកសាលាក្រៅ មិនធ្លាប់មានរឿងអ្វីកើតឡើងនោះទេ ទើបតែអ្នកទោសស្រីម្នាក់ ឈ្មោះ រឿន ចរិយា ជាប់ឃុំនៅទីនោះ ស្រាប់តែមានបញ្ហាជាមួយអ្នកទោសស្រីគ្នាឯងតែម្ដង។
លោកបន្តទៀតថា ស្ត្រីរូបនេះ ពិតជាក្អេងក្អាង តាំងតែពីនៅខាងក្រៅគុកម៉្លេះ ហើយមិនខ្លាចនរណាម្នាក់ឡើយ ប៉ុន្តែចំពោះការប្រើអំពើហិង្សាវាយតប់គ្នានេះ ខាងលោកមិនទាន់ដឹងច្បាស់ថា មកពីមូលហេតុអ្វីឱ្យប្រាកដនៅឡើយទេ ខណ:កំពុងតែធ្វើការសាកសួរ ស្រាវជ្រាវរកមូលហេតុពិតប្រាកដ។ ទោះបីជាយ៉ាងណាក៏ដោយ បច្ចុប្បន្ន ខាងមន្ត្រីជំនាញនគរបាលស្នងការខេត្ត កំពុងរៀបចំឯកសារកសាងសំណុំរឿង ដើម្បីបញ្ជូនទៅអយ្យការអមសាលាដំបូងខេត្ត ឱ្យចាត់ការតាមនីតិវិធីច្បាប់៕ ដោយ៖សុខហៃ
