(ខេត្តបាត់ដំបង)៖ យុវជន០២នាក់ត្រូវបានកម្លាំងអធិការដ្ឋាននគរបាលក្រុងបាត់ដំបង សហការជាមួយកម្លាំងប៉ុស្តិ៍នគរបាលរដ្ឋបាល វត្តគរចុះប្រតិបត្តិការបង្ក្រាបឃាត់ខ្លួនភ្លាមៗខណៈពួកគេកាន់ដាវសាំម៉ូរ៉ៃអូសកាត់ថ្នល់ទៅមកៗ។
លោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបងបានប្រាប់ឱ្យដឹងថា នៅក្នុងកិច្ចប្រតិបត្តិការខាងលើនេះធ្វើឡើងនៅវេលាម៉ោង២១ និង៤៥នាទី ថ្ងៃទី១៩ ខែសីហា ឆ្នាំ២០១៩ នៅចំណុចភូមិខ្សាច់ពោយ សង្កាត់វត្តគរ ក្រុងបាត់ដំបង។
យុវជនទំនើងទាំងពីរនាក់ត្រូវបានឃាត់ខ្លួនរួមមាន៖
១- ឈ្មោះ ឈឿង អ៊ុន ភេទ ប្រុស អាយុ៣២ឆ្នាំ មានទីលំនៅ ភូមិខ្សាច់ពោយ សង្កាត់វត្តគរ ក្រុងបាត់ដំបង
២- ឈ្មោះ កុយ រំ ភេទប្រុស អាយុ២២ឆ្នាំ មានទីលំនៅស្នាក់នៅក្នុងរោងចក្រទឹកកកសេះហោះ ស្ថិតនៅភូមិខ្សាច់ពោយ សង្កាត់វត្តគរ ក្រុងបាត់ដំបង។
នៅក្នុងកិច្ចប្រតិបត្តិការនេះដែរសមត្ថកិច្ចជំនាញដកហូតវត្ថុតាងបានមានកាំបិតដាវសាំម៉ូរ៉ៃ០១ដើមប្រវែង០១ម៉ែត្រផងដែរ។
លោក អធិការ ឆាង វណ្ណឆៃ បានបញ្ជាក់បន្តថា យុវជនទាំងពីរនាក់ក្រោយពីផ្នែកជំនាញ បានធ្វើការសាកសួរ និងទទួលស្គាល់កំហុសសមត្ថកិច្ចជំនាញរបស់លោកអប់រំធ្វើកិច្ចសន្យា និងឱ្យអាណាព្យាបាលយកត្រឡប់ទៅលំនៅដ្ឋានវិញនៅព្រឹកថ្ងៃទី២០ ខែសីហានេះវិញហើយ៕ ដោយ រៀម សាលី
