ខេត្តបាត់ដំបង៖ ថ្លែងក្នុងពិធីបញ្ចុះបឋមសិលាបើកការដ្ឋានសាងសង់ រោងចក្រប្រព្រឹត្តកម្មទឹកស្អាតខេត្តបាត់ដំបង របស់មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តបាត់ដំបង នារសៀលថ្ងៃទី២៥ ខែមករា ឆ្នាំ២០២៣នេះ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា ស្របតាមយុទ្ធសាស្ត្រចតុកោណដំណាក់កាលទី៤ គឺ មនុស្ស ,ទឹក ,ភ្លើង ,និងផ្លូវ ជាក់ស្តែងថ្ងៃនេះយើងបានចាប់ផ្តើមដំណើរការសាងសង់ប្រព័ន្ធទឹកស្អាតមួយដែលមាន សមត្ថភាពផ្គត់ផ្គង់ ៥០០០០ម៉ែត្រគូបក្នុងមួយថ្ងៃ ហើយនេះជាការបង្កើតរោងចក្រប្រព្រឹត្តកម្មទឹកស្អាតខ្នាតធំមួយជាប្រវត្តិសាស្ត្រមិនធ្លាប់មានពីមុននៅក្នុងខេត្តបាត់ដំបង។
ឯកឧត្តមកិត្តិសេដ្ឋាបណ្ឌិតបានបន្តថា មានទឹកស្អាតទើបមានការអភិវឌ្ឍ ផ្តើមចេញពីការផ្គត់ផ្គង់ទឹកស្អាតបានគ្រប់គ្រាន់នេះហើយ ទើបអាចជួយដល់ការធ្វើអោយប្រសើរឡើងនៅកំរិតជីវភាពរស់នៅរបស់ប្រជាពលរដ្ឋ ប្រជាជនយើង ហើយយើងមានលទ្ធភាពអភិវឌ្ឍន៍មូលដ្ឋានឃុំសង្កាត់ គ្រប់ ក្រុង ស្រុក ខេត្តរបស់យើងបាន ក៏ដូចជាសមិទ្ធផលថ្មីនេះរបស់រាជរដ្ឋាភិបាលកម្ពុជាដែលជួយដោះស្រាយបញ្ហាទាំងអស់នេះ ហេតុនេះហើយទើបកម្ពុជាមានពាក្យស្លោកថា (បានទឹកផឹក កុំភ្លេចប្រភពទឹក) ប៉ុន្តែឱកាសមាសដែលផ្តល់អំណោយផលសម្រាប់ការអភិវឌ្ឍន៍របស់យើង គឺឋិតលើតម្លៃនៃសុខសន្តិភាព ស្ថេរភាពនយោបាយ និងស្ថេរភាពសង្គម ដែលកម្ពុជាយើងសម្រេចបាន ហើយត្រូវបានថែរក្សាការពារអោយបានជាដាច់ខាត ទោះបីជាឋិតក្នុងតម្លៃណាក៏ដោយ ដូច្នេះពាក្យថាអរគុណសន្តិភាព និងដឹងគុណសម្តេចតេជោ ហ៊ុនសែន ឋិតនៅជាប់ជានិច្ចក្នុងបេះដូងរបស់យើងទាំងអស់គ្នា។
បន្ថែមពីនេះ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ បានសម្តែងនូវការគោរពដឹងគុណយ៉ាងជ្រាលជ្រៅបំផុតចំពោះសម្តេចតេជោ នាយករដ្ឋមន្ត្រីដែលបានដឹកនាំបញ្ជាជាប់ជាប្រចាំ ប្រកបដោយភាពឈ្លាសវៃ ចក្ខុវិស័យមុតស្រួច និងម៉ឺងម៉ាត់ ក្នុងការប្រយុទ្ធប្រឆាំងនឹងជំងឺឆ្លងកូវីដ១៩ ការពារអាយុជីវិត និងសុខភាពប្រជាជនកម្ពុជា ឆ្លងកាត់គ្រាលំបាកលំបិនសព្វបែបយ៉ាង និងកាលទេសៈបិទប្រទេស បែមកជាការបើកប្រទេសឡើងវិញលើគ្រប់វិស័យ ដែលស្ថានការណ៍វិវត្តត្រឡប់មកបើកសកម្មភាព សេដ្ឋកិច្ចសង្គមរបស់ប្រទេសជាតិយើងឡើងវិញ ហុចផលល្អណាស់សម្រាប់ការស្តារ សេដ្ឋកិច្ច និងជីវភាពរស់នៅរបស់ប្រជាជនកម្ពុជាក្រោយវិបត្តិកូវីដ១៩ ពិសេសកាលពីឆ្នាំ២០២២កន្លងទៅនេះ ដែលប្រទេសកម្ពុជាបានបំពេញតួនាទីជាប្រធានអាស៊ាន ដែលត្រូវបានមជ្ឈដ្ឋានជាតិ និងអន្តរជាតិ វាយតំលៃថាកម្ពុជាបានបំពេញតួនាទីបានយ៉ាងល្អប្រសើរជាទីបំផុត នាំមកនូវកិត្យានុភាពជាតិ លើឆាកអន្តរជាតិ ដោយសារកម្ពុជាបានធ្វើម្ចាស់ផ្ទះក្នុងការរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធជាមួយបណ្ដាប្រទេសមហាអំណាចលើពិភពលោក។
