ខេត្តបាត់ដំបង៖ កម្លាំងការិយាល័យជំនាញនៃស្នងការដ្ឋាននគរបាលខេត្តបាត់ដំបងបានចុះប្រតិបត្តិការបង្ក្រាបករណីលួចលាក់ប្រមូលផ្តុំលេងល្បែងស៊ីសងជល់មាន់ខុសច្បាប់មួយកន្លែងក្នុងបទល្មើសជាក់ស្តែង។
លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានអោយដឹងថា កិច្ចចុះប្រតិបត្តិការបង្ក្រាបករណីខាងលើនេះធ្វើឡើងកាលពីថ្ងៃទី២៧ ខែវិច្ឆិកា ឆ្នាំ២០២២ នៅត្រង់ចំណុចក្រុមទី០៩ ស្ថិតក្នុងភូមិអូរតានប់ សង្កាត់ក្តុលដូនទាវ ក្រុងបាត់ដំបង ខេត្តបាត់ដំបង។
ជាមួយកិច្ចប្រតិបត្តិការខាងលើនេះដែរ ក្នុងបទល្មើសជាក់ស្តែងនគរបាលជំនាញក្រសោបបានអ្នកពាក់ព័ន្ធសរុបចំនួន ១២នាក់ ដែលភាគច្រើនអ្នកទាំងអស់គ្នាមានទីលំនៅ ក្នុងសង្កាត់ក្តុលដូនទាវ និងសង្កាត់ស្លាកែត ក្នុងក្រុងបាត់ដំបង និងបានដកហូតវត្ថុតាងល្មើសជាច្រើនរួមមាន÷ មាន់ជល់ចំនួន ០២ក្បាល, ម៉ូតូចំនួន ០៨គ្រឿង, រថយន្ត ០១គ្រឿង ស៊ុម, សង្វៀន និងសម្ភារ:ពាក់ព័ន្ធផ្សេងទៀតផងដែរ។
ក្រោយពីឃាត់ខ្លួនចំពោះមុខកម្លាំងការិយាល័យជំនាញបាននឹងកំពុងកសាងសំណុំរឿងទៅលើជនពាក់ព័ន្ធទាំងអស់ ព្រមទាំងវត្ថុតាងដើម្បីបញ្ជូនទៅកាន់សាលាដំបូងខេត្តបាត់ដំបងចាត់ការបន្តតាមនីតិវិធី៕