រាជធានីភ្នំពេញ ៖ ករណីប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តពោធិ៍សាត់ ព្រមទាំងអនុប្រធានរបស់ខ្លួន ដែលត្រូវអង្គភាពប្រឆាំងអំពើពុករលួយ (ACU) ធ្វើការឃាត់ខ្លួនកាលពីចុងខែកក្កដា កន្លងទៅនេះ ឥឡូវអង្គភាពប្រឆាំងអំពើពុករលួយ បានបង្ហាញថា ខ្លួនបានរកឃើញលុយជិត៤០ម៉ឺនដុល្លារអាមេរិក ដែលប្រធានមន្ទីររូបនេះបានប្រព្រឹត្តអំពើពុករលួយរយៈពេល៣ឆ្នាំកន្លងមក។
នៅក្នុងរបាយការណ៍ នៃកិច្ចប្រជុំលើកទី៤៨ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ បានបញ្ជាក់ថា តាមការស្រាវជ្រាវរកបានភស្តុតាងរបស់ ACU និងតាមការសារភាពរបស់សាម៉ីខ្លួន តាំងពីឆ្នាំ២០១៦មក លៀម ប៊ុនរឿន ដែលជាប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តពោធិ៍សាត់ បានយកលុយសេវាក្រៅច្បាប់ចំនួន ១៤០ករណី បានប្រាក់ ៣៧២.៧៤៧ដុល្លារ (សាមសិបប្រាំពីរម៉ឺន ពីរពាន់ ប្រាំពីររយសែសិបប្រាំពីរដុល្លារ) និងជាង ៤៩លានរៀល ដោយមិនទាន់រាប់ករណី ដែលលោក លៀម ប៊ុនរឿន បានទទួលប្រាក់ ២ម៉ឺនដុល្លារ ដែល ACU បានទទួលពាក្យបណ្តឹងចុងក្រោយនោះផង។
ជាមួយគ្នា ACU ក៏បានរកឃើញលុយចំនួន ១៧.៥២៩ដុល្លារ និង ១៦.២៥០.០០០រៀល ក្នុងនោះមានលុយដែលដាក់ក្នុងស្រោមសំបុត្រចំនួន៦ស្រោមសំបុត្រ និងឯកសារមួយចំនួន ត្រូវបានរកឃើញនៅក្នុងការិយាល័យរបស់លោក លៀម ប៊ុនរឿន នៅថ្ងៃទី២៧ ខែកក្កដា ឆ្នាំ២០១៩ ដែលសាម៉ីខ្លួនទទួលស្គាល់ថា ជាលុយបានដោយខុសច្បាប់មួយចំនួន។
ACU បញ្ជាក់ថា ជារួមក្រោយពីទទួលតំណែងជាប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តពោធិ៍សាត់ ពីឆ្នាំ២០១៦មក រហូតដល់ថ្ងៃត្រូវបានឃាត់ខ្លួន លោក លៀម ប៊ុនរឿន បានប្រើប្រាស់ប្រាក់ដែលជាផល នៃបទល្មើសក្នុងការជួសជុលផ្ទះចំនួន៤ម៉ឺនដុល្លារ និងទិញផ្ទះពីរកន្លែងតម្លៃសរុបចំនួន២៤ម៉ឺនដុល្លារអាមេរិក, ទិញដីមួយកន្លែងទៀតតម្លៃ ៤ម៉ឺន៤ពាន់ដុល្លារ ហើយសង់ផ្ទះត្រចៀកកាំអស់ ៤ម៉ឺនដុល្លារទៀត, ដូរឡាន Lexus 570 ទិញឡាន KIA PICANTO ដើម្បីទុកដាក់ប្រាក់ពីផលបទល្មើសរបស់ខ្លួន៕