ខេត្តបាត់ដំបង៖ នៅព្រឹកថ្ងៃទី០៤ ខែកញ្ញា ឆ្នាំ២០២២នេះ ក្រុមក្រឡាហោមមនុស្សធម៌ ដឹកនាំដោយឯកឧត្តម ខាន់ ម៉ាណេ រដ្ឋលេខាធិការក្រសួងសាធារណការ និងដឹកជញ្ជូន អមដំណើរដោយឯកឧត្ដម ច័ន្ទ សុផល អ្នកតំណាងរាស្ត្រមណ្ឌលខេត្តបាត់ដំបង ឯកឧត្តម សឿម ប៊ុនរិទ្ធ អភិបាលរងខេត្ត ឯកឧត្តម ព្រួញ រិទ្ធថា ទីប្រឹក្សាសម្តេចក្រឡាហោម សខេង និងជាប្រធានមន្ទីរសាធារណការនិងដឹកជញ្ជូនខេត្ត បាននាំយកអំណោយសម្តេចក្រឡាហោម ស ខេង ផ្តល់ជូនវិទ្យាល័យអប់រំពិសេស (កុមារគថ្លង់ )ក្នុងក្រុងបាត់ដំបង។
ស្ថិតក្នុងឱកាសនោះ ឯកឧត្តម ខាន់ ម៉ាណេ រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់សម្តេចក្រឡាហោម ស ខេង បានមានប្រសាសន៍ ដោយមានការផ្តាំផ្ញើនិងការយកចិត្តទុកដាក់ពីសម្តេចក្រឡាហោម ស ខេង ពិសេសលោកជំទាវ ញ៉ែម សាខន សខេង ចំពោះកុមារគថ្លង់ក្នុងវិទ្យាល័យអប់រំពិសេសក្នុងក្រុងបាត់ដំបងដែលកំពុងខ្វះខាត សម្តេច និងលោកជំទាវ ក៏បានចាត់អោយឯកឧត្តមដឹកនាំក្រុមការងារក្រឡាហោម ចុះពាំនាំយកអំណោយ រួមមាន -អង្ករ ២តោន ,មី ២០កែស ,ត្រីខ ២កែស ,ទឹកសុទ្ធ ៥០យួរ ,នំធុង ១០ធុងធំ ,ទឹកក្រូច ៥កែស ,ស្ករគ្រាប់ ,ម៉ាស់ ២៥០០ម៉ាស ,អាកុល ១៣០ដប ,សៀវភៅ ប៉ិច ព្រមទាំងបានឧបត្ថម្ភលោកគ្រូអ្នកគ្រូ ក្នុងមួយនាក់ ៥០០០០រៀល និងបានរៀបចំជាអាហារមួយពេលជូនដល់ លោកគ្រូ អ្នកគ្រូ និង កុមារគថ្លង់ផងដែរ។
ឯកឧត្តមបានបញ្ជាក់ថា ក្នុងនាមជួសមុខដ៏ខ្ពង់ខ្ពស់សម្តេចក្រឡាហោម សខេង សូមធ្វើការថ្លែងអំណរចំពោះលោកគ្រូ អ្នកគ្រូ ទាំងអស់ដែលបានលះបង់កម្លាំងកាយចិត្តគ្រប់បែបយ៉ាងចូលរួមក្នុងវិស័យអប់រំ ពិសេសគឺលោកគ្រូ អ្នកគ្រូ ដែលមានជំនាញបង្រៀនអោយកុមារពិការភ្នែក កុមារគថ្លង់ អាចសិក្សាបានអ្នកខ្លះរហូតរៀនចប់ដល់មហាវិទ្យាល័យផងដែរ។
