ត្បូងឃ្មុំ៖ ឯកឧត្តបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ អញ្ជើញជាអធិបតីក្នុងពិធីសច្ចាប្រណិធាន និងបំពាក់កន្សែងកាយរឹទ្ធិជាតិកម្ពុជា ខេត្តត្បូងឃ្មុំ នាព្រឹកថ្ងៃទី៣១ ខែសីហា ឆ្នាំ២០២២ រួមទាំងមន្រី្តរាជការ ព្រមទាំងលោកគ្រូអ្នកគ្រូ ៥៧រូប រួមនិងមន្រ្តីរាជការថ្នាក់ក្រសួង ខេត្តត្បូងឃ្មុំចំនួន៥៣រូប និងសិស្សានុសិស្ស ដែលត្រូវបំពាក់កន្សែងកាយរឹទ្ធិ ចំនួន ៥៤៨ ស្រី២៥៧នាក់ នាក់ នៅបរិវេណសាលាបឋមសិក្សារកណ្តោលជ្រុំ ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ។
លោក អ៉ិន ពៅសម្បត្តិ បានលើកឡើងយ៉ាងដូច្នេះជូនថ្នាក់ដឹកនាំក្នុងពិធីថា ការបង្កើតឲ្យមានកាយរិទ្ធជាតិ កម្ពុជា គឺជាការងារចាំបាច់ ដែលមិនអាចខ្វះបាន សម្រាប់ការអប់រំ ទាំងក្នុងនិងក្រៅប្រព័ន្ធ ដើម្បីអភិវឌ្ឍន៍កុមារ យុវជន ឱ្យមានសក្តានុពលភាព ពេញលេញ ទាំងផ្លូវកាយ ទាំងផ្លូវចិត្ត បញ្ញាស្មារតី មានការទទួលខុសត្រូវចំពោះខ្លួនឯង និងសង្គមជាតិ ក្លាយជាពលរដ្ឋល្អ ចេះរួមរស់ជាមួយគ្នា ដោយភាពសុខដុមរមនា និងប្រកបដោយសេចក្តីសុខសន្តិភាព ឯកភាពជាតិ ទាំងក្នុងសហគមជាតិ និងអន្តរជាតិ ។
ឯកឧត្ដមបណ្ឌិត បានលើកឡើងថាៈ រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាមគ្គុទេសក៍ ប្រកបដោយគតិបណ្ឌិត ដែលសម្ដេចតែងតែបាន ចាត់ទុក ប្អូនៗក្មួយៗកុមារ ជាទំពាំងស្នងឫស្សី ជាកម្លាំងស្នូល ជាកោសិកាជាតិ ដ៏រឹងមាំ និងជាអនាគតប្រទេសជាតិ ។
នៅថ្ងៃនេះដែរឯកឧត្តមបណ្ឌិតបានផ្តល់ កិច្ចការសំខាន់ៗមួយចំនួន ដូចខាងក្រោម ៖
១-ត្រូវខិតខំពង្រីកសមាជិកភាព ដែលជាកម្លាំងនៃចលនាកាយរឹទ្ធិឲ្យបានកាន់តែច្រើនថែមទៀត ជាពិសេសនៅតាមបណ្ដាគ្រឹះស្ថានអប់រំនានាក្នុងខេត្ត ។
២-ត្រូវបន្តរៀបចំចងក្រងប្រព័ន្ធល្បាត កង និងកងឯកភាពឲ្យបានសមស្របតាមលក្ខណៈបច្ចេកទេសកាយរឹទ្ធិក្នុងជួរយុវជន ។
៣-ត្រូវបន្តបំផុសសកម្មភាពស្ម័គ្រចិត្ត ពង្រឹងសកម្មភាពធ្វើអំពើល្អ និងការអប់រំសីលធម៌ ព្រមទាំងជំរុញឲ្យសមាជិកកាយរឹទ្ធិគ្រប់រូបចូលរួមចំណែកឲ្យកាន់តែសកម្ម ដើម្បីកាត់បន្ថយអំពើអសកម្មនានានៅក្នុងសង្គម ។
៤-ត្រូវបន្តអនុវត្តតួនាទីភារកិច្ចរបស់ខ្លួនឲ្យបានខ្ជាប់ខ្ជួនស្របតាមគោលបំណង គោលការណ៍ និងវិធីនៃចលនាកាយរឹទ្ធិ ព្រមទាំងត្រូវបន្តពង្រឹងការគោរពវិន័យ ច្បាប់កាយរឹទ្ធិ និងពង្រីកការធ្វើអំពើល្អ សំដៅកសាងជនគំរូ ក្នុងជួរយុវជនឲ្យបានកាន់តែច្រើនឡើង ដើម្បីឲ្យសមាជិកកាយរឹទ្ធិទាំងអស់ក្លាយជាពលរដ្ឋល្អ និងមានសមត្ថភាពគ្រប់គ្រាន់ មានស្មារតីទទួលខុសត្រូវខ្ពស់ និងជាអ្នកបន្តវេនដ៏មានប្រសិទ្ធភាពក្នុងកិច្ចការអភិវឌ្ឍសហគមន៍ និងប្រទេសជាតិ។
ឯកឧត្ដមបណ្ឌិត បានបញ្ជាក់ថាៈ កិច្ចការនេះ មានសារៈសំខាន់ណាស់ សម្រាប់ការអភិវឌ្ឍខ្លួន របស់ក្មួយ ឱ្យប្រកបដោយសមត្ថភាព មានចំណេះដឹង ចំណេះធ្វើ សីលធម៌ និងដោយសុខសន្តិភាព ជួយឱ្យសង្គមជាតិ មានយុត្តិធម៌ មានប្រជាធិបតេយ្យ និងនីតិរដ្ឋ ។
លោកបានផ្ដាំផ្ញើដល់ប្អូនៗ ក្មួយៗ កាយរិទ្ធទាំងអស់ នៅពេលនេះ ត្រូវគោរពឱ្យបានខ្ជាប់ខ្ជួន នូវពាក្យសច្ចាប្រណិធាន របស់កាយរិទ្ធ ដែលមានខ្លឹមសារថា ដោយយកកិត្តិយសរបស់ខ្លួន ជាសាក្សី ជួយឱ្យអស់ពីចិត្តពីថ្លើម ជាតិ សាសនា ព្រះមហាក្សត្រ ជួយសង្គ្រោះមនុស្សជាតិ គ្រប់កាលៈទេសៈ គោរពច្បាប់កាយរិទ្ធ និងថែរក្សាខ្លួនប្រាណ ឱ្យមានកាយសម្បទាមាំមួន ចិត្តគំនិតភ្ញាក់រលឹក និងមានសីលធម៌ខ្ពស់៕
