ខេត្តបាត់ដំបង ! លោកជំទាវ ព្រំ សុភី អនុរដ្ឋលេខាធិការក្រសួងបរិស្ថាន តាំងនាមអោយក្រសួងបរិស្ថាន បានអំពាវនាវដល់សាធារណជនទាំងអស់ សូមបន្តស្មារតីរួមគ្នាថែរក្សាស្រលាញ់ ការពារបរិស្ថាននិងភពផែនដីរបស់យើង។
លោកជំទាវអនុរដ្ឋលេខាធិការក្រសួងបរិស្ថានថ្លែងបែបនេះនៅក្នុងពិធីអបអរសាទរទិវាបរិស្ថានជាតិ បរិស្ថានពិភពលោក ៥មិថុនា ឆ្នាំ២០២២ ដែលប្រព្រឹត្តធ្វើឡើងនាព្រឹកថ្ងៃទី ០៥ ខែឧសភា ឆ្នាំ២០២២ នៅបរិវេណសួននាគសន្តិភាព ស្ថិតក្នុងសង្កាត់ស្វាយប៉ោ ក្រុងបាត់ដំបង ដោយមានការអញ្ជើញចូលរួមពីឯកឧត្តមអភិបាលរងនៃគណៈអភិបាលខេត្តបាត់ដំបង ឯកឧត្តម លោកជំទាវ លោក លោកស្រី យុវជនកាយរឹទ្ធ យុវជនកាកបាទក្រហមកម្ពុជា លោកគ្រូ អ្នកគ្រូ ព្រមទាំងប្អូនៗសិស្សានុសិស្សផងដែរ។
បន្ថែមពីនេះលោកជំទាវបានថ្លែងថា យើងអាចរៀបចំកម្មវិធីនេះឡើងបានយើងក៏មិនភ្លេចអរគុណសន្តិភាព ដែលធ្វើអោយយើងបានជួបជុំ បានមានភាពរីកចំរើនដូចពេលនេះ ហើយសំរាប់ឆ្នាំ២០២២នេះគឺជាខួបលើកទី២៩ ហើយដែលប្រទេសកម្ពុជារបស់យើងបានរៀបចំទិវាបរិស្ថានជាតិ បរិស្ថានពិភពលោក ដែលពិភពលោកគេបានរៀបចំយូរហើយតែយើងបានចូលរួមចំណែកជាមួយអង្គការសហប្រជាជាតិ អញ្ចឹងទេសូមធ្វើយ៉ាងណាយើងផ្សព្វផ្សាយបន្ថែមទៀត និងចូលរួមទាំងអស់គ្នាដើម្បីថែទាំភពផែនដីដើម្បីសុខភាពយើងទាំងអស់គ្នា។
លោកជំទាវបានបញ្ជាក់ថា បើមិនមានការរៀបចំទុកដាក់សំរាមអោយបានត្រឹមត្រូវនោះទេ សំរាមនិងក្លាយជាសារធាតុដែលអាចបំពុលទាំងទឹក បំពុលទាំងបរិយាកាសរបស់យើង ពិសេសថង់ប្លាស្ទិចដូច្នេះយើងត្រូវព្យាយាមធ្វើយ៉ាងណាកាត់បន្ថយការប្រើប្រាស់ថង់ប្លាស្ទិក ហើយបើមិនប្រើទេគឺកាន់តែល្អ។
