ស្ទឹងត្រែង៖ ទីតាំងតំបន់ភ្នំជម្រកសត្វឆ្វាំងនៅក្នុងឃុំសំអាងស្រុកថាឡាបរិវ៉ាត់ខេត្តស្ទឹងត្រែងត្រូវបានមន្ទីរទេសចរណ៍ខេត្តសហការជាមួយអង្គការកម្មវិធីផ្លាស់ប្តូរបទពិសោធន៍អនុផលព្រៃឈើហៅកាត់ថា NTFP EP ធ្វើជាដែគូ រួមគ្នារៀបចំអភិវឌ្ឍន៍ឱ្យក្លាយជាតំបន់អេកូទេសចរណ៍ធម្មជាតិមានស្តង់ដារ ដើម្បីបម្រើឱ្យវិស័យទេសចរណ៍ នៅក្នុងខេត្ត។
ក្នុងកិច្ចចុះពិនិត្យសក្តានុពលទេសចរណ៍នៅតំបន់ភ្នំជម្រកសត្វឆ្វាំង នៅថ្ងៃទី២៦មេសាឆ្នាំ២០២២ លោកអ៊ន់ប៉ោសឿនប្រធានមន្ទីរទេសចរណ៍ខេត្តបានបញ្ជាក់ថា អាជ្ញាធរពាក់ព័ន្ធ និងមន្ត្រីសហគមន៍នៅមូលដ្ឋាននេះ ត្រូវជួយបន្តអភិរក្ស សក្តានុពលដែលយើងមានស្រាប់ ឱ្យនៅគង់វង្ស ដូចជាដើមឈើធំៗ ទីតាំងល្អាងថ្មពីធម្មជាតិ សម្រាប់រៀបចំឱ្យកាន់តែមានភាពបៃតងស្អាតសម្រាប់ទាក់ទាញភ្ញៀវទេសចរមកកម្សាន្ត។
លោកបញ្ជាក់ថា ចាប់ពីនៅឆ្នាំ២០១៨មកមន្ទីរទេសចរណ៍បានសហការជាមួយអង្គការដៃគូនានា រៀបចំភ្នំជម្រកសត្វនេះបានជាសហគមន៍រមណីយដ្ឋានអេកូទេសចរណ៍រួចហើយ ដែលមានសមាជិកចូលរួមប្រមាណជាង២០ គ្រួសារ។
លោកបន្តថា យើងនៅត្រូវការអ្នកជួយបន្តទៀតព្រោះសក្តានុពលធម្មជាតិដែលមានស្រាប់ អាចរៀបចំអភិវឌ្ឍបន្ថែម ឱ្យដើរទន្ទឹមគ្នានិងការអភិរក្ស ដើម្បីបង្កលទ្ធភាពឱ្យប្រជាសហគមន៍នាំគ្នាការពារធនធានធម្មជាតិផង និងរកបានប្រាក់ចំណូលសម្រាប់ដោះស្រាយជីវភាពផង។
លោក ស៊ឹមប៊ុនធឿន ប្រធានកម្មវិធីប្រចាំប្រទេសកម្ពុជានៃអង្គការកម្មវិធីផ្លាស់ប្តូរបទពិសោធន៍អនុផលព្រៃឈើហៅកាត់ថា NTFP EP បានចាត់ទុកថាសក្តានុពលនៅតំបន់ភ្នំនេះអាចរៀបចំធ្វើឱ្យភ្ញៀវពេញចិត្តបានព្រោះអ្វីៗនៅមានស្ថានភាពដើមដែលជាធនធានបំរើឱ្យវិស័យទេសចរណ៍បានល្អប្រសើរហើយអង្គការដៃគូគាំទ្រផ្នែកថវិកាទៅតាមជំហានៗដោយទីភ្នាក់ងារអភិវឌ្ឍនិងសហប្រតិបត្តិការស្វីសនិងស៊ុយអែតដើម្បីបើកកិច្ចសហការគ្នាធ្វើឡើងក្នុងរយៈពេល២ឆ្នាំបន្តទៀត។
លោកបន្តថា កិច្ចការងារនេះសូមឯកភាពជាមួយមន្ទីរទេសចរណ៍និងអាជ្ញាធរនៅមូលដ្ឋានសហការក្នុងការរៀបចំតំបន់រមណីយដ្ឋានធម្មជាតិនៅភ្នំជម្រកសត្វនេះឱ្យបានឆាប់ទៅតាមស្តង់ដារនៃគម្រោងប្លង់មេរបស់មន្ទីរទេសចរណ៍ ដែលមានស្រាប់ រៀបចំជាល្អាងប្រចៀវ.ល្អាងអូនបង.ល្អាងភ្ចាប់និស្ស័យ.ល្អាងលោកសឹង.ល្អាងសត្វអន្សង. ល្អាងឥសីសំណាក់ធ៌ម.និងទីតាំងបួងសួងលោកតាភឹមជាដើម។
លោកញានផុនប្រធានសហគមន៍ភ្នំជម្រកសត្វឆ្វាំងឃុំសំអាងស្រុកថាឡាបរិវ៉ាត់បានបញ្ជាក់ថា៖ប្រជាសហ គមន៍ចង់បានការអភិវឌ្ឃន៍តំបន់នេះយូរមកហើយតែពុំមានលទ្ធភាព ពេលនេះបានមន្ទីរទេសចរណ៍និងអង្គការដៃគូមានផែនការជាក់លាក់រៀបចំប្រជាសហគមន៍រីករាយនិងចូលរួមដើម្បីសហការរៀប ចំអភិវឌ្ឍតំបន់អេកូទេសចរណ៍ឱ្យមានភាពរីកចម្រើនទៅបានឆាប់រហ័ស។
សូមបញ្ជាក់ថា នៅក្នុងឃុំសំអាងក្រៅពីភ្នំជម្រកសត្វ មានភ្នំឈ្ងោកនិងភ្នំក្ងោកមាសស្ថិតនៅជិតគ្នានេះ ហើយប្រជាពលរដ្ឋនៅក្នុងឃុំត្រូវការដៃគូមកវិនិយោគធ្វើជារមណីយដ្ឋានអេកូទេសចរណ៍ព្រោះសក្តានុពលធម្មជាតិនៅភ្នំនេះមានអំណោយផលទៅលើវិស័យទេសចរណ៍ស្រាប់ទៅហើយនៅខ្វះតែផ្លូវចូលនិងផ្លូវឡើងទៅទស្សនាតែប៉ុណ្ណោះ៕ ក្រសួងព័ត៌មាន
