ខេត្តបាត់ដំបង! ឯកឧត្តម សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានណែនាំដល់អាជ្ញាធរមានសមត្ថកិច្ច ត្រូវខិតខំរក្សាឲ្យបាននូវសុខសន្ដិភាព និងសន្ដិសុខ ហើយត្រូវរៀបចំកំណត់ និងបង្ក្រាបឲ្យបាននូវការញុះញង់បំភ្លៃព័ត៌មានដែលបង្កជារឿងអសន្ដិសុខក្នុងសង្គម និងត្រូវខិតខំអប់រំប្រជាពលរដ្ឋឲ្យមានការយល់ដឹងអំពីបញ្ហាប្រឈមនានា សណ្ដាប់ធ្នាប់សង្គម បញ្ហាគ្រឿងញៀន អំពើហិង្សា និងការចូលរួមគោរពច្បាប់នានារបស់ព្រះរាជាណាចក្រកម្ពុជា ដើម្បីធ្វើឲ្យប្រទេសកម្ពុជាកាន់តែមានសុខសណ្ដាប់ធ្នាប់សង្គមផងដែរ ។
ឯកឧត្តម រដ្ឋលេខាធិការប្រចាំការក្រសួងមហាផ្ទៃមានប្រសាសន៍បែបនេះនៅពេលអញ្ជើញជាអធិបតីភាពក្នុងពិធីប្រកាសចូលកាន់មុខតំណែង អភិបាលរង នៃគណៈអភិបាលខេត្តបាត់ដំបង នាព្រឹកថ្ងៃទី០៤ ខែមីនា ឆ្នាំ២០២២ នៅសាលប្រជុំសាលាខេត្តបាត់ដំបងដោយមានការអញ្ជើញចូលរួមពី ឯកឧត្តមរដ្ឋលេខាធិការ អនុរដ្ឋលេខាធិការក្រសួងមហាផ្ទៃ ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម សុខ លូ អភិបាល នៃគណៈអភិបាលខេត្ត ឯកឧត្តម អគ្គនាយក អគ្គនាយករង ព្រមឯកឧត្តម លោកជំទាវ សមាជិក ក្រុមប្រឹក្សាខេត្ត លោកស្នងការនគរបាល មេបញ្ជាការកងរាជអាវុធហត្ថ មេបញ្ជាការតំបន់ប្រតិបត្តិការសឹករង និងលោក លោកស្រីជាប្រធាន និងអនុប្រធានមន្ទីរអង្គភាពពាក់ព័ន្ធជុំវិញខេត្តផងដែរ។
បន្ទាប់ពីការប្រគល់អនុក្រឹត្យ ស្ដីពីការផ្ទេរភារកិច្ចមន្ដ្រីរាជការរួច លោក ខូយ រីដា ដែលត្រូវបានផ្ទេរភារកិច្ចពីអភិបាលរងខេត្តពោធិ៍សាត់ មកទទួលភារកិច្ចជាអភិបាលរងខេត្តបាត់ដំបង បានឡើងមានប្រសាសន៍ប្ដេជ្ញាចិត្ត ជូនដល់ថ្នាក់ដឹកនាំ និងអង្គពិធីទាំងមូល ក្នុងការបន្តខិតខំប្រឹងប្រែងចូលរួមជួយក្នុងការងារជាមួយរដ្ឋបាលខេត្តបាត់ដំបង និងបន្តខិតខំប្រឹងប្រែងក្នុងការបម្រើប្រជាពលរដ្ឋផងដែរ ។
ឋិតក្នុងឱកាសនោះ ឯកឧត្តម សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ តំណាងដ៏ខ្ពង់ខ្ពស់សម្តេចក្រឡាហោម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថ្លែងនូវការកោតសរសើរដល់លោក យឹម សៀប ដែលកន្លងមកលោកបានខិតខំប្រឹងប្រែងបំពេញភារកិច្ចរបស់ខ្លួនបានយ៉ាងល្អ ក្នុងការរួមចំណែកជាមួយឯកឧត្តម លោកជំទាវក្នុងរដ្ឋបាលខេត្ត ក្នុងការចូលរួមអភិវឌ្ឍន៍ក្នុងខេត្តបាត់ដំបង ហើយក៏បានផ្ដាំផ្ញើដល់លោក ខូយ រីដា ដែលទើបបានផ្ទេរភារកិច្ចមកខេត្តបាត់ដំបង ខិតខំបន្តចូលរួមក្នុងការអភិវឌ្ឍខេត្តបាត់ដំបងឲ្យកាន់តែរីកចម្រើន ។
ឯកឧត្តមបានបន្តទៀតថា ក្រោមការដឹកនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានធ្វើឲ្យប្រទេសកម្ពុជាមានសុខសន្ដិភាពពេញលេញ ធ្វើឲ្យមានការអភិវឌ្ឍ រីកចម្រើនពីមួយថ្ងៃទៅមួយថ្ងៃ ហើយបច្ចុប្បន្ននេះសម្ដេចបានដាក់ចេញនូវយុទ្ធសាស្ត្រខិតខំប្រឹងប្រែងក្នុងការទប់ស្កាត់ការឆ្លងជាសហគមន៍នៃជំងឺកូវីដ-១៩ដែលកំពុងរីករាលដាលខ្លាំង ដោយអនុវត្តនូវយុទ្ធសាស្ដ្រចាក់វ៉ាក់សាំងជូនប្រជាពលរដ្ឋទាំងដូសមូលដ្ឋាន និងដូសជំរុញ ។
បន្ថែមពីនេះឯកឧត្តម បានមានប្រសាសន៍ណែនាំដល់អាជ្ញាធរមានសមត្ថកិច្ច ត្រូវខិតខំរក្សាឲ្យបាននូវសុខសន្ដិភាព និងសន្ដិសុខ ហើយត្រូវរៀបចំកំណត់ និងបង្ក្រាបឲ្យបាននូវការញុះញង់ បំភ្លៃព័ត៌មានដែលបង្កជារឿងអសន្ដិសុខក្នុងសង្គម ហើយត្រូវខិតខំអប់រំប្រជាពលរដ្ឋឲ្យមានការយល់ដឹងអំពីបញ្ហាប្រឈមនានា សណ្ដាប់ធ្នាប់សង្គម បញ្ហាគ្រឿងញៀន អំពើហិង្សា និងការចូលរួមគោរពច្បាប់នានារបស់ព្រះរាជាណាចក្រកម្ពុជា ដើម្បីធ្វើឲ្យប្រទេសកម្ពុជា កាន់តែមានសុខសណ្ដាប់ធ្នាប់សង្គមផងដែរ ៕