ខេត្តបាត់ដំបង! ជនសង្ស័យម្នាក់ត្រូវបានកម្លាំងជំនាញនៃអធិការដ្ឋាននគរបាលស្រុកសំឡូតឃាត់ខ្លួនពីបទប្រើប្រាស់អាវុធខុសច្បាប់។
លោកវរសេនីយ៍ទោ ម៉ែន រីម អធិការនគរបាលស្រុកសំឡូតបានអោយដឹងថា÷ បន្ទាប់ពីទទួលបានសេចក្តីរាយការណ៍ពីប្រជាពលរដ្ឋពាក់ព័ន្ធករណីប្រើប្រាស់អាវុធខុសច្បាប់នៅក្នុងមូលដ្ឋានរបស់ខ្លួនចំណុចភូមិតាតោក ឃុំតាតោក ស្រុកសំឡូត នៅយប់ថ្ងៃទី ២០ ខែមករា ឆ្នាំ ២០២២ ភ្លាមនោះលោកបានដឹកនាំកម្លាំងផ្នែកជំនាញចុះទៅពិនិត្យនិងធ្វើការបង្ក្រាបឃាត់ខ្លួនជនសង្ស័យ០១នាក់ រួមជាមួយវត្ថុតាងកាំភ្លើង០១ដើមនិងគ្រាប់មួយចំនួន។
ជនសង្ស័យត្រូវបានឃាត់ខ្លួនឈ្មោះ ឈួន វ៉ាន់ថា ភេទប្រុស អាយុ ៣៩ឆ្នាំ រស់នៅភូមិតាតោក ឃុំតាតោក ស្រុកសំឡូត ចំណែកឯវត្ថុតាងកាំភ្លើង AK ៤៧ ស្វាយបត់០១ដើម រួមទាំងគ្រាប់ចំនួន ២២គ្រាប់ផងដែរ។
ប្រភពខាងលើបានអោយដឹងថា÷ ដោយផ្តើមចេញពីជម្លោះក្នុងគ្រួសារជាមួយប្រពន្ធ នៅយប់កើតហេតុជនសង្ស័យក៏បានទាញយកកាំភ្លើងដែលលាក់ទុកមកគំរាមបាញ់ និងដេញប្រពន្ធចេញពីផ្ទះទើបធ្វើឲ្យមានការភ្ញាក់ផ្អើលដឹងដល់នគរបាលមូលដ្ឋានចុះឃាត់ខ្លួននិងដកហូតយកកាំភ្លើងបានតែម្តង។
ក្រោយពីឃាត់ខ្លួនបច្ចុប្បន្នជនសង្ស័យត្រូវបានកម្លាំងនគរបាលស្រុកសំឡូត រៀបចំកសាងសំណុំរឿងបញ្ជូនបន្តទៅកាន់ការិយាល័យជំនាញខេត្តដើម្បីចាត់ការតាមនីតិវិធីច្បាប់៕
