ខេត្តបាត់ដំបង៖ រថយន្តសេរីទំនើប០១គ្រឿងបើកបរឆ្លងផ្លូវមិនប្រយ័ត្មត្រូវរថយន្តដឹកថ្មធុនធ្ងន់បើកបុកពេញទំហឹងបណ្តាលអោយខូចខាតយ៉ាងដំណំ រីឯម្ចាស់រងរបួសធ្ងន់ត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យ។
សមត្ថកិច្ចបានអោយដឹងថា ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងនៅវេលាម៉ោងប្រមាណ ១៤និង៣០នាទី ថ្ងៃទី១៩ ខែមករា ឆ្នាំ២០២២ នៅតាមបណ្តោយផ្លូវវាងក្រុង(ហៃវ៉េ)ត្រង់ចំណុចភូមិវត្តគរ សង្កាត់វត្តគរ ក្រុងបាត់ដំបង ឈមនឹងឃុំឈើទាល ស្រុកបាណន់ ខេត្តបាត់ដំបង រវាងរថយន្តនិងរថយន្ត។
ប្រភពនៅកន្លែងកើតហេតុបានប្រាប់អោយដឹងថា នៅមុនពេលកើតហេតុគេឃើញរថយន្តលុចស៊ីស៤៧០ពណ៌ស០១គ្រឿង ពាក់ស្លាកលេខ ភ្នំពេញ. 2AQ.4530 បើកបរដោយបុរសម្នាក់ឯងដែលគេស្គាល់ថាឈ្មោះ ឌឿន អាយុជាង៣០ឆ្នាំ ក្នុងទិសដៅពីជើងទៅត្បូង ខណៈដែលព្យាយាមឆ្លងថ្នល់ភ្លាមនោះក៏ស្រាប់តែមានរថយន្តដឹកថ្មធុនធ្ងន់០១គ្រឿងជារបស់ក្រុមហ៊ុនធ្វើផ្លូវបានបើកបរក្នុងល្បឿនយ៉ាងលឿងក្នុងទិសដៅពីលិចទៅកើត ក៏បានជ្រុលទៅបុករថយន្តលុចស៊ីសពីចំហៀងពេញទំហឹងបណ្តាលអោយប៉ើង ខ្ទាតទៅបុកបង្គោលផ្លាកសញ្ញាខូចខាតយ៉ាងដំណំ និងម្ចាស់រងរបួសធ្ងន់ត្រូវបានសាច់ញាតិដឹកទៅសង្គ្រោះបន្ទាន់នៅឯមន្ទីរពេទ្យ ចំណែកអ្នកបើកបររថយន្តធុនធ្ងន់បានចុះរត់គេចខ្លួនបាត់ស្រមោល។
ក្រោយពេលកើតហេតុសមត្ថកិច្ចជំនាញបានចុះទៅវាស់វែងធ្វើគំនូសហេតុរួច បានស្ទូចយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំម្ចាស់ចូលខ្លួនមកដោះស្រាយតាមផ្លូវច្បាប់។
