ខេត្តបាត់ដំបង ៖ មនុស្សប្រមាណជាង ១០០០នាក់បានចូលរួមក្នុង ព្រឹត្តិការណ៍រត់ម៉ារ៉ាតុងមនុស្សធម៌ ឆ្នាំ២០២២ ដើម្បីកៀរគរថវិកាជួយដល់កុមារកំព្រាក្នុងខេត្តបាត់ដំបង ដែលពិធីនេះប្រារព្ធធ្វើឡើងក្រោមអធិបតីភាពដ៏ខ្ពង់ខ្ពស់ឯកឧត្តម ស សុខា អនុប្រធានសហភាពសហព័ន្ធយុវជនកម្ពុជាទទួលបន្ទុកបីខេត្តគឺខេត្តបាត់ដំបង បន្ទាយមានជ័យ និងព្រៃវែង តំណាងដ៏ខ្ពង់ខ្ពស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.)។
ព្រឹត្តិការណ៍ “បាត់ដំបងម៉ារ៉ាតុងមនុស្សធម៌” ឆ្នាំ២០២២នេះ ប្រារព្ធធ្វើឡើងកាលពីព្រឹកថ្ងៃទី ១៩ ខែមករា ឆ្នាំ២០២២ នៅបរិវេណខាងមុខសាលាខេត្តបាត់ដំបង និងជាព្រឹត្តិការណ៍លើកទី៤ ដែលរៀបចំដោយសហភាពសហព័ន្ធយុវជនកម្ពុជាខេត្តបាត់ដំបង សហការជាមួយរដ្ឋបាលខេត្ត គោលបំណងដើម្បីកៀរគរថវិកាជួយដល់កុមារកំព្រាក្នុងខេត្ត។
ឯកឧត្តម ធូ ភា អភិបាល នៃគណៈអភិបាលរងខេត្ត តំណាងឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានមានប្រសាសន៍ថា នេះគឺជាព្រឹត្តិការណ៍ដ៏មានគុណតម្លៃមនុស្សធម៌ប្រសើរថ្លៃថ្លាបំផុតដែលរៀបចំឡើងដោយសហភាពសហព័ន្ធយុវជនកម្ពុជាខេត្តបាត់ដំបង ហើយក្នុងនាមឯកឧត្តម សុខ លូ អភិបាលនៃគណៈអភិបាលខេត្ត ឯកឧត្តមសូមវាយតម្លៃខ្ពស់និងកោតសរសើរចំពោះសកម្មភាពសប្បុរសធម៌របស់យុវជន ស.ស.យ.ក ខេត្តបាត់ដំបងនាពេលនេះក៏ដូចជាពេលកន្លងមកដែលតែងតែចូលរួមគ្រប់សកម្មភាពប្រយោជន៍សង្គមជានិច្ច ដែលសកម្មភាពដ៏ប្រពៃថ្លៃថ្លាទាំងនេះបានដើរតួនាទីយ៉ាងសំខាន់ដែលក្លាយជំគំរូទៅដល់យុវជនផ្សេងៗទៀតក្នុងការចូលរួមកសាងនិងអភិវឌ្ឍន៍ប្រទេសជាតិ។
ឯកឧត្តមបានមានប្រសាសន៍ទៀតថា ដោយឋិតក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងក្រោមការផ្តល់អនុសាសន៍ណែនាំជាប្រចាំ ព្រមទាំងឧបត្ថម្ភកំទ្រគ្រប់សព្វបែបយ៉ាងពីសំណាក់សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងជាប្រធានក្រុមការងារថ្នាក់ជាតិចុះមូលដ្ឋានខេត្តបាត់ដំបង ធ្វើអោយខេត្តបាត់ដំបងមានការរីកចម្រើនយ៉ាងឆាប់រហ័សលើគ្រប់វិស័យដែលជាមូលដ្ឋានផ្តល់នូវសេចក្តីសុខកាយ សប្បាយចិត្ត ដល់ប្រជាពលរដ្ឋទូទាំងខេត្តក្នុងទស្សនវិស័យអភិវឌ្ឍខេត្តបាត់ដំបងអោយក្លាយជាខេត្តទេសចរណ៍ធម្មជាតិ វប្បធម៌ និងប្រពៃណី ស្របតាមការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិយ៉ាងពិតប្រាកដ។
ឯកឧត្តម ស សុខា អនុប្រធានសហភាពសហព័ន្ធយុវជនកម្ពុជាតំណាងអោយឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ឯកឧត្តមបានសម្តែងការកោតសរសើរទៅដល់ឯកឧត្តម ស រដ្ឋា ប្រធានសហភាពសហព័ន្ធយុវជនកម្ពុជាខេត្តបាត់ដំបង និងគណៈគ្រប់គ្រងទទួលផ្នែកផែនកីឡា ដែលបានផ្តួចផ្តើមគំនិតក្នុងការរៀបចំកម្មវិធីរត់ម៉ារ៉ាតុងនិងដើម្បីស្វែងរកថវិកាជួយដល់កុមារកំព្រាក្នុងខេត្តបាត់ដំបង ហើយក៏សូមថ្លែងអំណរអរគុណចំពោះ សប្បុរសជន ក៏ដូចជាឯកឧត្តម លោកជំទាវ ជាអភិបាល អភិបាលរងខេត្ត លោក លោកស្រី ថ្នាក់ដឹកនាំមន្ទីរពាក់ព័ន្ធទាំងអស់ដែលបានចូលរួមយ៉ាងសកម្ម ។
ជាមួយគ្នានេះឯកឧត្តមសង្ឃឹមនិងជឿជាក់ថា តាមរយៈភាពទន់នាថ្ងៃនេះ ឯកឧត្តមប្រធាន ស.ស.យ.ក.ខេត្ត ក៏ដូចជាក្រុមគ្រួសាររបស់សហភាពសហព័ន្ធយុវជនកម្ពុជាខេត្តនិងបន្តក្នុងការរៀបចំកម្មវិធីកីឡាដើម្បីផ្តល់ឱកាសអោយក្រុមការងារថ្នាក់ខេត្ត យុវជនរបស់យើងទាំងគ្រឹះស្ថានឧត្តមសិក្សារដ្ឋនិងឯកជនទាំងអស់បានចូលរួមប្រកួតប្រជែងលេងលក្ខណៈសប្បាយក្នុងនាមគ្រួសារបាត់ដំបង។
គួរបញ្ជាក់ថា បន្ទាប់ពីបានរត់ប្រណាំងយ៉ាងស្វិតស្វាញរបស់កីឡាករ កីឡាការិនី ដែលមានចំងាយដី០៥គីឡូម៉ែត្ររួចមក ជាលទ្ធផល ចំណាត់ថ្នាក់លេខ០១ផ្នែកបុរសបានទៅឈ្មោះ MIRoSHi AVE វ័យ៥១ឆ្នាំ ជាជនបរទេស លេខ០២បានទៅលើឈ្មោះ Dauey Cal ko វ័យ ៣៣ឆ្នាំ ជាជនបរទេស និងលេខ០៣ បានទៅលើឈ្មោះ សុយ មាស យុវជន ស.ស.យ.ក.ស្រុកភ្នំព្រឹកវ័យ២១ឆ្នាំ ។និងផ្នែកនារី ចំណាត់ថ្នាក់លេខ០១ បានទៅស្ត្រីជនជាតិបរទេសឈ្មោះAGNES វ័យ៥៥ឆ្នាំ លេខ០២បានទៅលើឈ្មោះ ញ៉ូ ចំរ៉ុម វ័យ៣០ឆ្នាំ(ករុណា បាត់ដំបង) លេខ០៣ ឈ្មោះ រ៉ា ធីតា វ័យ១៦ឆ្នាំ សិស្សវិទ្យាល័យព្រះមុនីវង្ស។
