នាវាមុជទឹក១គ្រឿង បំពាក់ដោយក្បាលគ្រាប់នុយក្លេអ៊ែ របស់កងទ័ពជើងទឹកអាមេរិក បានបង្ហាញខ្លួននៅក្នុងមូលដ្ឋានសមុទ្រប៉ាស៊ីហ្វិក ក្បែរនឹងកោះតៃវ៉ាន់ ជាដំណើរទស្សនកិច្ចដ៏កម្រមួយ កាលពីចុងសប្តាហ៍ថ្មីៗនេះ។ នេះបើតាមការចេញផ្សាយដោយសារព័ត៌មាន RT កាលពីថ្ងៃទី១៧ ខែមករា ឆ្នាំ២០២២។
នាវាមុជទឹក១គ្រឿងនេះ មានឈ្មោះ USS Nevada ជានាវាមុជទឹកដើរដោយថាមពលនុយក្លេអែរ ដែលត្រូវបានដាក់ឱ្យដំណើរការក្នុងឆ្នាំ១៩៨៦។ នាវានេះ ផ្ទុកមីស៊ីលប្រភេទ Trident II D-5 រហូតដល់ ២០គ្រាប់ និង “ក្បាលគ្រាប់នុយក្លេអ៊ែររាប់សិប ផងដែរ” ។
កងទ័ពជើងទឹកអាមេរិក បាននិយាយថា ដំណើរទស្សនកិច្ចនេះ គឺជាការពង្រឹងកិច្ចសហប្រតិបត្តិការរវាងសហរដ្ឋអាមេរិក និងសម្ព័ន្ធមិត្តនៅក្នុងតំបន់។
សូមបញ្ជាក់ថា ដំណើររបស់នាវាមុជទឹកនេះបានធ្វើឡើងខណៈដែលក្រុង វ៉ាស៊ីនតោន និងក្រុងប៉េកាំង កំពុងមានបញ្ហាកាន់តែខ្លាំងឡើង ជាពិសេសជុំវិញបញ្ហាកោះតៃវ៉ាន់ ដោយសហរដ្ឋអាមេរិកគាំទ្រដល់រដ្ឋបាលកោះដែលគ្រប់គ្រង ដោយខ្លួនឯងនេះ៕