ខេត្តបាត់ដំបង៖ នៅព្រឹកថ្ងៃទី១០ ខែមករា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក មិកាមិ ម៉ាសាហ៉ីរ៉ូ ឯកអគ្គរាជទូតជប៉ុនប្រចាំនៅកម្ពុជា បានអញ្ជើញជាអធិបតីដ៏ខ្ពង់ខ្ពស់សម្ពោធដាក់អោយដំណើរការប្រើប្រាស់នូវកំណាត់ផ្លូវជាតិលេខ៥ បាត់ដំបង សេរីសោភ័ណ។
នៅក្នុងឱកាសសម្ពោធនោះដែរ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានថ្លែងថាដោយមើលឃើញពីសារៈសំខាន់ភាពមមាញឹកនៅផ្លូវជាតិលេខ០៥នេះរួមទាំងស្ថានភាពនូវការខូចខាតរបស់ផ្លូវដែលបង្កការលំបាកក្នុងការធ្វើដំណើររបស់បងប្អូនប្រជាពលរដ្ឋនិងការដឹកជញ្ជូនផ្សេងៗ សម្ដេចតេជោនាយករដ្ឋមន្ត្រីបានស្នើសុំហិរញ្ញប្បទានពីរដ្ឋាភិបាលជប៉ុនដើម្បីសាងសង់លើកម្រិតគុណភាពនិងពង្រីកផ្លូវនេះឡើងវិញ ។
ឯកឧត្តមទេសរដ្ឋមន្ត្រីបានបន្តថា គម្រោងធ្វើឲ្យប្រសើរឡើងវិញផ្លូវជាតិលេខ០៥នេះមានប្រវែងសរុប 366គីឡូម៉ែត្រចាប់ផ្ដើមពីព្រែកក្រាមរហូតដល់ក្រុងប៉ោយប៉ែតខេត្តបន្ទាយមានជ័យគម្រោងប្រើប្រាស់ថវិកាប្រមាណ ៥០០ លានដុល្លារអាមេរិក ដោយបែងចែកជាបីកំណាត់រួមមានកំណត់ទី០១ប៉ែកខាងជើងបាត់ដំបងសេរីសោភ័ណ្ឌមានប្រវែង84 ចុច74 គីឡូម៉ែត្របានបញ្ចប់ការសាងសង់ជាស្ថាពរ 100% កំណាត់ទី 2ប៉ែកខាងត្បូង ព្រែកក្តាមធ្លាម្អមប្រវែង 135 ចុច25 គីឡូម៉ែត្រ សាងសង់បាន64 ភាគរយគ្រោងនឹងបញ្ចប់នៅពាក់កណ្ដាលឆ្នាំ 2002 កំណត់ទី3ភាគកណ្ដាល(ធ្លាម្អម-បាត់ដំបង និងសិរីសោភ័ណ-ប៉ោយប៉ែត) មានប្រវែង ១៤៦,០៤គីឡូម៉ែត្រ ដែលកំណាត់ធ្លាម្អម-បាត់ដំបង សម្រេចបានប្រមាណ៥៥% និងកំណាត់សិរីសោភ័ណ-ប៉ោយប៉ែត កំពុងរៀបចំនីតិវិធីដេញថ្លៃជ្រើសរើសក្រុមហ៊ុនសាងសង់។
ជាមួយគ្នានោះដែរសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រសាសន៍សម្តែងការរីករាយចំពោះការទទួលបានសមិទ្ធផលថ្មីកំណាត់ផ្លូវជាតិលេខ៥ ភាគខាងជើងតភ្ជាប់បាត់ដំបង និងបន្ទាយមានជ័យ កំណាត់ផ្លូវជាតិលេខ៥នេះ គឺជាសមិទ្ធផលកើតចេញពីកិច្ចសហប្រតិបត្តិការរវាងកម្ពុជា និងជប៉ុន ជាផ្លូវមួយរឹងមាំល្អ។
សម្តេចតេជោ បានថ្លែងអំណរគុណដល់ក្រសួងសាធារណការ និងដឹកជញ្ជូន អាជ្ញាធរមីន ព្រមទាំងអាជ្ញាធរពាក់ព័ន្ធទាំងអស់ ដែលបានប្រឹងប្រែងរួមគ្នាធ្វើឱ្យលេចឡើងនូវវត្តមានផ្លូវជាតិលេខ៥ ហើយរង់ចាំតែមួយឆ្នាំទៀតប៉ុណ្ណោះផ្លូវជាតិលេខ៥តភ្ជាប់ពីព្រែកក្តាម មកដល់ធ្លាម្អមខេត្តពោធិ៍សាត់ នឹងរួចរាល់ហើយ ខណៈពីធ្លាម្អមឆ្ពោះមកកាន់ខេត្តបាត់ដំបង ក៏អាចនឹងរួចរាល់ផងដែរ។
សម្តេចតេជោ ហ៊ុន សែន បានរំលឹកដល់ការធ្វើសង្គ្រាមជាមួយខ្មែរក្រហមនៅក្នុងខេត្តបាត់ដំបង សម្តេចបានមើលឃើញច្បាស់ថាមិនអាចយកសង្គ្រាមទៅបញ្ចប់សង្គ្រាមនោះទេអាស្រ័យហេតុនេះហើយទើបសម្តេចបានដាក់ចេញកិច្ចចរចាដើម្បីស្វែងរកការបិទបញ្ចប់សង្គ្រាម ហើយមេរៀនកម្ពុជាល្មមគ្រប់គ្រាន់ហើយដែលទាមទារឱ្យរួមគ្នាការពារឱ្យបាននូវសុខសន្តិភាពដើម្បីទទួលបាននូវការកសាង និងអភិវឌ្ឍន៍កម្ពុជា ក្រោយពេលសម្តេចបិទបញ្ចប់ភ្លើងសង្គ្រាមហើយនោះ កិច្ចការមួយចំនួនដែលសម្តេចត្រូវយកចិត្តទុកដាក់ធ្វើគឺប្រែក្លាយតំបន់ភ្លើងសង្គ្រាមទៅជាទីផ្សារ និងការអភិវឌ្ឍ។
ជាមួយគ្នានេះសម្តេចតេជោ ហ៊ុន សែន បានថ្លែងអំណរគុណដល់តួអង្គពាក់ព័ន្ធព្រមទាំងប្រជាពលរដ្ឋដែលអនុវត្តន៍តាមការអំពាវនាវរបស់រាជរដ្ឋាភិបាលក្នុងការចាក់វ៉ាក់សាំង និងអនុវត្តវិធានាការនានាតាមការដាក់ចេញរបស់រាជរដ្ឋាភិបាល ពិសេសបន្តចាក់វ៉ាក់សាំងដូសជំរុញ ដូសទី៤។
